Sumartónleikaröðin Bláa kirkjan er fastur liður í menningarlífi Austfirðinga og nú er búið að staðfesta dagskrá sumarsins sem að venju verður spennandi.
Sumartónleikaröðin hefur fyrir löngu fest sig í sessi sem einn af helstu menningarviðburðum í tónlistarlífi Austfirðinga. Þar er boðið upp á fjölbreytta dagskrá tónlistar þar sem færi gefst á að hlýða á marga af áhugaverðustu tónlistarmönnum landsins í frábærum tónleikasal Bláu kirkjunnar á Seyðisfirði.
Sumartónleikaröð Bláu kirkjunnar var sett á laggirnar árið 1998 af söngkonunni og tónlistarkennaranum Muff Worden sem kom frá Bandaríkjunum til að kenna við Tónlistarskólann á Seyðisfirði. Muff lést langt fyrir aldur fram árið 2006 og er tónleikaröðin haldin í minningu og til heiðurs henni. Um er að ræða fimm tónleika og fara þeir fram í Seyðisfjarðarkirkju á miðvikudagskvöldum í júlí og ágúst.
Dagskrá 2021:
- júlí Saxófónar á Seyðisfirði - Vigdís Klara Aradóttir og Guido Baeumer leika á alt-saxófóna
Vigdís Klara og Guido hafa leikið saman á saxófóna í áraraðir, m.a. með íslenska saxófónkvartettinum og saxófónkvartettinum „mit links“ sem starfaði í Sviss. Á tónleikunum verða fluttir tveir flautudúettar og þá verða einnig leikin þrjú verk sem upphaflega voru samin fyrir saxófóna.
- júlí High Energy American Blues and Bluegrass with Dirty Cello
Dirty Cello kemur með mikla orku og frumlegan snúning á blús og blúgrass. Dirty Cello er leidd af Rebeccu Roudman, einstaklega líflegum cellóleikara, en hljómsveitin gerir út frá vesturströnd Bandaríkjanna.
- júlí Sjana syngur strákana
Söngkonan Kristjana Stefáns, gítarleikarinn Ómar Guðjónsson og kontrabassaleikarinn Þorgrímur Jónsson ætla að bjóða uppá fjölbreytta dagskrá þar sem þau flytja í léttjözzuðum búningi lög frá m.a. Bubba Morthens, Björgvini Halldórs, KK, Hauki Morthens, Ragga Bjarna, Vilhjálmi Vilhjálms, Valgeiri Guðjóns, Gunnari Þórðar og fleirum.
- júlí Aurora
Olga Vocal Ensemble er a cappella sönghópur sem hefur verið starfræktur síðan árið 2012. Þema tónleikanna er Aurora, en norðurljósin mála fallegar myndir á himnum á dimmasta tíma ársins, eitthvað sem Olga vill gera með röddum sínum. Efnisskráin er fjölbreytt og lögin tengjast þema tónleikanna á einn eða annan hátt.
- ágúst Mánaskin og kantsteinar // Moonlight and Curbstones
Coney Island Babies er „indí-band“, innblásið af þungum og þéttum takti hinnar austfirsku öldu. Þau koma frá Neskaupstað og hafa gefið út tvær hljómplötur. Á tónleikunum verður flutt úrval laga af þeim.
Tónleikarnir hefjast kl 20.30 og er aðgangseyrir er 3000.kr (2000 fyrir námsmenn, eldri borgara og öryrkja). Við bendum á spennandi tilboð sem finna má í Austurlands appinu – 20% afsláttur fyrir notendur appsins
Nánari upplýsingar veitir Jónína Brynjólfsdóttir, verkefnastjóri Bláu kirkjunnar, í síma 899-5892 og með tölvupósti blaakirkjan@blaakirkjan.is