Erindi er varðar velferð og heilsueflingu nýrra foreldra

Málsnúmer 202511179

Fjölskylduráð Múlaþings - 147. fundur - 25.11.2025

Fyrir liggur erindi frá Ásrúnu Mjöll Stefándóttur, dagsett 19. 11.2025, er varðar velferð og heilsueflingu nýrra foreldra, einkum nýbakaðar mæður. Í erindinu fer Ásrún Mjöll fram á að fjölskylduráð taki málið til umfjöllunar og kanni möguleika á að þróa eða efla þjónustu við nýja foreldra.

Fjölskylduráð þakkar erindið og tekur undir mikilvægi þess að styðja við heilsu og velferð nýrra foreldra. Ráðið áréttar að hlutverk sveitarfélagsins felst einkum í því að skapa aðstæður til hreyfingar og útivistar en jafnframt að þjónusta þá sem leita til félagsþjónustu í samræmi við gildandi lög og viðeigandi reglur sveitarfélagsins.

Ráðið óskar eftir að fá fulltrúa Heilbrigðisstofnunar Austurlands á fund til upplýsinga og samtals.

Fjölskylduráð Múlaþings - 150. fundur - 06.01.2026

Erindið var tekið fyrir á 147 fundi fjölskylduráðs þar sem ráðið óskaði eftir að fá fulltrúa Heilbrigðisstofnunar Austurlands á fund til upplýsinga og samtals. Oddný Ösp Gísladóttir, deildarstjóri Fjölskyldudeildar HSA mætir á fundinn undir þessum lið.

Oddný fór yfir stuðning HSA við nýbakaða foreldra og er henni þakkað fyrir komuna.

Málið áfram í vinnslu.

Fjölskylduráð Múlaþings - 157. fundur - 21.04.2026

Fyrir liggur erindi frá Ásrúnu Mjöll Stefánsdóttur, dagsett 19. nóvember 2025, er varðar velferð og heilsueflingu nýrra foreldra, með sérstakri áherslu á nýbakaðar mæður. Erindið hefur áður verið tekið fyrir á 147. og 150. fundi fjölskylduráðs.

Fjölskylduráð þakkar fyrir framlagt erindi en sér sér ekki fært að verða við því að svo stöddu. Ráðið áréttar að hlutverk sveitarfélagsins felst einkum í því að skapa aðstæður til hreyfingar og útivistar auk þess að veita þjónustu á fjölskyldusviði til þeirra sem eftir henni leita, í samræmi við gildandi lög og reglur.

Samþykkt með fimm atkvæðum, einn situr hjá (JHÞ) og einn á móti (ÁMS).

Fulltrúi V-lista leggur fram eftirfarandi bókun:
Fulltrúi VG telur að þó hlutverk sveitarfélagsins sé skilgreint í lögum felist raunverulegur styrkur þess einnig í því að ganga lengra og bjóða upp á þjónustu sem bætir lífsgæði íbúa og gerir sveitarfélagið að eftirsóknarverðum búsetukosti. Sveitarfélagið sinnir nú þegar fjölmörgum verkefnum sem ekki eru lögbundin, svo sem á sviði heilsueflingar, frístunda og samfélagsverkefna, enda er ljóst að slík þjónusta hefur jákvæð áhrif á vellíðan íbúa og aðdráttarafl svæðisins. Undirrituð telur eðlilegt að sá sami vilji nái einnig til nýbakaðra mæðra.

Ef markmið okkar er að laða að og halda í ungar fjölskyldur þarf Múlaþing að vera leiðandi í stuðningi við foreldra. Heilsuefling á fyrstu stigum foreldrahlutverksins er fjárfesting í velferð fjölskyldna og framtíð sveitarfélagsins.

Undirrituð mun áfram beita sér fyrir því að slík úrræði verði þróuð.
ÁMS.