Innsent erindi, staða húsasmíðameistara Múlaþings.

Málsnúmer 202512118

Umhverfis- og framkvæmdaráð Múlaþings - 171. fundur - 12.01.2026

Fyrir umhverfis- og framkvæmdaráði liggur erindi frá fulltrúa í ráðinu (ÁMS). Erindið varðar möguleikan á því að kanna það að hjá Múlaþingi starfi húsasmíðameistari sem í samstarfi við aðra iðnmenntaða starfsmenn, annast endurbætur og viðhald á eignum Múlaþing samkvæmt fyrirfram skilgreindri forgangsröðun. Óskað er eftir því að þessi möguleiki verði greindur með tilliti til helstu kostnaðarliða.

Eftirfarandi tillaga lögð fram:
Umhverfis- og framkvæmdaráð þakkar fulltrúa ráðsins (ÁMS) fyrir erindið.

Ráðið telur ekki þörf á því að setja af stað greiningu, að svo búnu.
Til upplýsinga þá eru þjónustumiðstöðvar Múlaþings mannaðar þannig að þar starfa m.a. iðnmenntað starfsfólk sem sér um viðhald og endurbætur á fasteignum í rekstri og eigu sveitarfélagsins.
Skipulag viðhalds- og framkvæmdaverkefna sveitarfélagsins byggir á reglubundnu mati á ástandi eigna, þjónustuþörf og fjárheimildum hverju sinni.

Samþykkt með 4 atkvæðum, 2 sátu hjá (ÁHB og PH), 1 á móti (ÁMS).

Fulltrúi V-lista (ÁMS) leggur til eftirfarandi bókun:
Erindi undirritaðrar snérist ekki um gagnrýni á núverandi skipulag eða starfsfólk, heldur um að kanna hvort stofnun sérstakrar stöðu húsasmíðameistara Múlaþings gæti bætt yfirsýn, gæði og nýtingu fjármuna.

Í bókun ráðsins er núverandi fyrirkomulagi lýst, en þar er ekki brugðist við þeirri beiðni að greina kostnað og bera hann saman við þann kostnað sem fellur til vegna utanaðkomandi ráðgjafa, hönnunar, eftirlits og svo framkvæmdanna sjálfra.

Slík greining gæti varpað ljósi á hvort með aukinni faglegri yfirsýn fólginni í slíku stöðugildi, mætti draga úr kostnaði, bæta gæði framkvæmda og tryggja betur samfellu og ábyrgð í verkefnum sveitarfélagsins.

Undirrituð telur mikilvægt að slíkur möguleiki verði skoðaður með hliðsjón af framtíðarverkefnum sveitarfélagsins og markmiði um hagkvæman og ábyrgan rekstur eigna Múlaþings og þykir því niðurstaða málsins miður.