Brotajárnssöfnun gekk vel

Í sumar stóð Múlaþing fyrir gjaldfrjálsri söfnun brotajárns í dreifbýli og þéttbýli sveitarfélagsins í samstarfi við Hringrás. Í ár fór söfnunin fram á svæði 1 sem telur: Seyðisfjörð, Borgarfjörð, Jökulsárhlíð, Hróarstungu, Hjaltastaðaþinghá og Eiðaþinghá. Íbúum, fyrirtækjum og stofnunum bauðst að nýta sér þjónustuna.

Söfnunin heppnaðist vel en rúm 100 tonn söfnuðust á 25 bæjum. Það er rúmur fjórðungur þess sem safnaðist í fyrra en þá tók söfnunin til sveitarfélagsins alls og söfnuðust rúm 367 tonn á 55 bæjum. Fjöldi ekinna kílómetra við söfnunina í ár var einnig um fjórðungur þeirra sem eknir voru í fyrra eða 2.466 km samanborið við 9.240 km í fyrra.

Á flestum bæjum var búið að safna brotajárni saman á aðgengilegt svæði fyrir söfnunarbíl og frágangur til fyrirmyndar. Múlaþing þakkar þeim sem nýttu sér þjónustuna fyrir góðar viðtökur og Hringrás fyrir gott samstarf.

Skemmtilegt innslag um söfnunina í sumar var birt í kvöldfréttum RÚV fyrir skemmstu.

Á næsta ári fer brotajárnssöfnun fram á svæði 2 sem telur: Egilsstaði og Fellabæ, Jökuldal, Fell, Skriðdal og Velli. Íbúar, fyrirtæki og stofnanir á því svæði eru hvött til að huga að umhverfi sínu og nýta sér þjónustuna. Átakið verður auglýst á vordögum.