Haldið var upp á Cittaslow sunnudaginn þann 1. október í ár. Venjan er að nota síðasta sunnudag í september til þess en vegna veðurs varð að fresta viðburðinum.
Að þessu sinni var ákveðið að halda upp á daginn í samstarfi við Skógræktarfélag Djúpavogs í Hálsaskógi rétt fyrir innan þorpið. Eins og margir vita urðu miklar skemmdir í skóginum í óveðri sem gekk yfir fyrir rúmu ári síðan. Undanfarið hefur verið unnið að því að fjarlægja stærstu trén sem brotnuðu eða rifnuðu upp í óveðrinu og hafa vinnuvélar verið nýttar til þess.
Á Cittaslow sunnudeginum komu íbúar svo saman og tóku þátt í hreinsunarstarfi á svæðinu og lagfæringum á göngustígum. Hafist var handa klukkan 10:00 um morguninn. Í hádeginu var boðið upp á kjötsúpu sem Kvenfélagið Vaka reiddi fram. Seinnipartinn var svo boðið upp á fjölbreytta dagskrá fyrir börn þar sem unnið var með efnivið úr skóginum. Eftir skemmtilega samverustund lauk svo dagskránni með litlum varðeldi sem Björgunarsveitin Bára hafði umsjón með.
