Þann 11. júní fór fram fundur sveitarstjórnar Múlaþings á Borgarfirði eystri. Í aðdraganda formlegs sveitarstjórnarfundar fundaði sveitarstjórnin með ungmennaráði Múlaþings. Þar fór ungmennaráð yfir nokkur mál sem þeim þykir mikilvægt að sveitarstjórn beiti sér í og komi í farveg í þágu ungs fólks í sveitarfélaginu.
Þar mátti meðal annars nefna að fá meiri afþreyingu fyrir ungmenni í samfélagið svo sem steypt borðtennisborð í Tjarnargarðinn, mikil áhersla var lögð á snjómokstur svo ungmenni í dreifbýli komist tímanlega í skóla og þá var fjallað um mikilvægi þess að ungmenni hefðu aðgang að sundlaugum og líkamsrækt í öllum byggðakjörnum með sama aðgangskortinu.
Ánægjulegt var að einmitt slíkt mál lá fyrir sveitarstjórnarfundinum síðar um daginn og var samþykkt svo nú geta íbúar keypt eitt kort sem gildir í sundlaugar og líkamsrækt á vegum sveitarfélagsins óháð staðsetningu. Munu þessi nýju kort taka gildi í haust.
Sveitarstjórn þakkaði ungmennaráði fyrir málefnalegan og vel skipulagðan fund og vísaði svo öllum málum sem frá þeim komu í ákveðinn farveg innan stjórnsýslunnar til frekari úrvinnslu.
Að loknum sveitarstjórnarfundi, sem fram fór í Fjarðarborg á Borgarfirði, skoðuðu sveitarstjórnarfulltrúar þær framkvæmdir sem nú standa yfir í Fjarðarborg áður en þeir fóru í heilsubótargöngu undir handleiðslu heimamannsins og sveitarstjórnarfulltrúans Helga Hlyns Ásgrímssonar.
Helgi fór með hópinn um svæði á Borgarfirði sem kallast Urðarhólar og er óhætt að mæla með þessari skemmtilegu gönguleið fyrir alla íbúa og gesti.
Fundur sveitarstjórnar með ungmennaráði Múlaþings
Framkvæmdir í Fjarðarborg skoðaðar
Heilsubótarganga í Urðarhólum
Myndir: Dagmar Ýr Stefánsdóttir
