Úthlutun Uppbyggingarsjóðs Austurlands fyrir árið 2026 fór fram við hátíðlega athöfn í Sköpunarmiðstöðinni á Stöðvarfirði á dögunum. Til úthlutunar voru rúmar 59 milljónir króna sem skiptust á milli 57 verkefna sem ýmist voru á sviði atvinnu og nýsköpunar, á sviði menningar eða stofn- og rekstrarstyrkir.
Alls 30 verkefni úr Múlaþingi hlutu styrki að þessu sinni og námu þeir rúmlega 30,6 milljónum króna. Hæsta styrkinn, tæpar þrjár milljónir króna, hlaut Félagsbúið Lindarbrekka til uppbyggingar menningar- og sögustaðar á Víðinesi í Fossárdal. Þá hlaut Ars Longa á Djúpavogi tveggja milljóna króna rekstrarstyrk og Skaftfell á Seyðisfirði fékk sömu upphæð í sýningardagskrá sína árið 2026. Austurbý á Egilsstöðum hlaut tæpar tvær milljónir til vöruþróunar og markaðssetningar afurða úr hunangi sem framleitt er á Héraði.
Meðal annarra verkefna sem hlutu styrki voru námskeiðaröð Hollvinasamtaka Gömlu kirkjunnar á Djúpavogi, flughátíðin Flug & fákar á Egilsstöðum, klifuraðstaða í Herðubreið á Seyðisfirði og leiklistarhópur fyrir börn á vegum Leikfélags Fljótsdalshéraðs. Nánar má lesa um úthlutunina, verkefnin og styrkþegana á vef Austurbrúar.
