Framboð í heimastjórn Djúpavogs

Ég sækist eftir sæti í heimastjórn Djúpavogs. Ég hef starfað sem sjómaður á Djúpavogi undanfarin tíu ár og fjölskyldan mín og ég höfum búið hér síðustu fimm ár.

Áður en ég flutti á Djúpavog rak ég líkamsræktarstöð, sinnti nefndarstörfum fyrir Ísafjarðarbæ og kláraði háskólanám í Reykjavík. Ég ólst jafnframt upp á Þingeyri í Ísafjarðarbæ og þekki því vel hvernig það er að búa í litlum byggðarkjarna innan stærra sveitarfélags. Sú reynsla hefur gefið mér góðan skilning á þeim áskorunum og tækifærum sem slík staða felur í sér. Áhugi minn á málefnum Djúpavogs hefur aukist jafnt og þétt á undanförnum árum. Í dag sit ég í stjórn Neista, er áheyrnarfulltrúi í fjölskylduráði Múlaþings og tek þátt í starfshópi um skipulag og starfsumhverfi leikskóla í Múlaþingi.

Ég tel heimastjórn gegna mikilvægu hlutverki sem rödd íbúa og tengingu milli samfélagsins og sveitarfélagsins. Ég sé mikil tækifæri fyrir Djúpavog í framtíðinni og tel öflugt atvinnulíf vera eina af lykilforsendum áframhaldandi uppbyggingar. Samhliða því verðum við að halda áfram að bæta lífskjör og aðstæður fólks, óháð því á hvaða æviskeiði það er.

Mig langar að leggja áherslu á að hlusta á raddir íbúa og vinna út frá þeirra sýn á samfélagið. Mér finnst einnig mikilvægt að góðar hugmyndir kafni ekki innan stjórnsýslunnar og að þeir einstaklingar sem vilja leggja sitt af mörkum til samfélagsins fái stuðning til þess. Ég vil leggja mitt af mörkum til að efla Djúpavog áfram sem sterkt og gott samfélag til að búa og starfa í.

Ég hef ákveðið að bjóða mig fram í heimastjórn. Mig langar að leggja mitt af mörkum til áframhaldandi uppbyggingar og ég trúi því að við getum gert enn betur saman.

Ég hef áhuga á að vinna að málefnum sem snerta daglegt líf okkar allra, þjónustu við íbúa, aðstöðu fyrir börn og ungmenni, málefni eldri íbúa, atvinnumál og að hlúa að sérstöðu og fegurð staðarins.

Mér finnst mikilvægt að hlusta á raddir íbúa og að ákvarðanir séu teknar í góðu samtali við samfélagið, hvort sem fólk býr á Djúpavogi eða á svæðinu í kring.

Ég vil vinna af heilindum, vera aðgengileg og leggja mig fram við að ná fram raunhæfum og jákvæðum breytingum.

Djúpivogur og nærsveitir skipta mig miklu máli og ég er tilbúin að leggja krafta mína í að efla og þróa samfélagið áfram.

Ég hef undanfarin ár verið í forsvari fyrir Íbúasamtök Djúpavogs og nærsveita og Hollvinasamtök um Gömlu kirkjuna, ásamt því að eiga sæti í Cittaslow samráðshópnum. Öll snúast þau um að bæta lífsgæði íbúa á svæðinu, hvert á sinn hátt.

Ég hef brunnið fyrir samfélaginu okkar frá því að ég man eftir mér en kannski aldrei meira en akkúrat nú.

Nú langar mig að hafa áhrif á stjórnsýslustiginu því það læðist að mér sá grunur að stefnan sé að framkvæma til hagræðingar frekar en til framtíðar. Sé það raunin töpum við öll til lengri tíma litið.

Þó rekstur sveitarfélagsins sé þröngur megum við ekki spara svo mikið að við týnum bæjarbragnum okkar, stoltinu af því að vera héðan eða að börnin okkar alist upp við lakari tækifæri en jafnaldrar þeirra annars staðar að óþörfu. Þá velur enginn að búa hérna. Hvorki þau þegar fram í sækir né aðrir.

Ég vil betri forgangsröðun í framkvæmdum sem auka lífsgæði hins almenna íbúa í hversdeginum en ekki ferðamannsins sem staldrar örstutt við. Grunnþjónusta og innviðir þurfa að vera í lagi. Boðleiðir þurfa að vera skýrar. Erindi íbúa eiga að fá faglega meðferð í kerfinu, alla leið. Það þarf að snúa vörn í sókn og halda íbúafundi örar til að ræða hvað er framundan frekar en að svara fyrir það sem búið er að gera. Svo raddir íbúa séu skýrar frá upphafi áður en farið er af stað. Svo fátt eitt sé nefnt.

Mér finnst fátt skemmtilegra en að hafa næg verkefni á minni könnu. Helst einhver sem þarfnast útsjónarsemi en byggja á traustum grunni hefða og sögu sem taka þarf með í reikninginn. Ég tel mig vera sterkan málsvara gamla Djúpavogshrepps og langar að taka þátt í að leiða hann inn í framtíðina án þess að fórna því sem skiptir okkur máli.

Ég gef áfram kost á mér í heimastjórn Djúpavogs. Mér hefur fundist starfið bæði áhugavert og gefandi og langar að nýta þá reynslu og þekkingu sem ég hef öðlast.

Eitt af því sem mér hefur þótt mikilvægast í starfi heimastjórnarfulltrúa er gott upplýsingaflæði til íbúa. Eins finnst mér afar mikilvægt að hlusta á sjónarmið þeirra og reyna að koma sem best til móts við þau við ákvarðanatöku.

Með það að leiðarljósi tókum við upp eftirfarandi verklag:

1. Yfirlitsskjal yfir þau mál sem hafa komið á borð heimastjórnar frá sameiningu, feril þeirra og stöðu - aðgengilegt öllum.
2. Liðurinn „Skýrsla fulltrúa sveitarstjóra“ í lok fundargerða, þar sem veittar eru upplýsingar um mál sem gagnlegt er fyrir íbúa að vita stöðuna á, en voru ekki á formlegri dagskrá fundarins.
3. Deiling fundargerða eftir heimastjórnarfundi í íbúahópinn á Facebook, til að vekja athygli á því að fundur hafi verið haldinn og hvað hafi verið tekið fyrir - og með því auðvelda íbúum að bregðast við ef ástæða er til.
4. Ítarlegar greinar í Bóndavörðuna þar sem farið er yfir stöðu helstu mála og framkvæmda - til viðbótar við íbúafundi vor og haust.
5. Undirbúningsfundir í byrjun vikunnar fyrir mánaðarlegu fimmtudagsfundi heimastjórnar, til að geta nýtt dagana á milli til að ræða málin betur, afla viðbótarupplýsinga og vera þannig sem best undirbúin til að taka ákvarðanir.

Verði ég kjörin mun ég leggja mig fram um að finna fleiri leiðir til aukins samtals og upplýsingaflæðis svo saman getum við gert gott samfélag enn betra.

Ég hef ákveðið að gefa kost á mér í heimastjórn Djúpavogs.

Nú starfa ég sem öryggis- og fræðslustjóri hjá Kaldvík og hef fjölbreytta reynslu úr atvinnulífi, úr stjórnsýslu, félagsstarfi, menningu og fleiru.

Ég hef mikinn metnað fyrir hönd Djúpavogs og vil sjá staðinn halda áfram að byggjast upp með fleiri tækifærum fyrir okkur og komandi kynslóðir.

Ábyrgð okkar felst í því að vanda okkur og reyna að gera það sem er best fyrir Djúpavog og nærsveitir til lengri tíma þannig að samfélagið nái að vaxa og dafna.

Ég sé fyrir mér að við getum gert Djúpavog að sterkara samfélagi með því að fjölga tækifærum til búsetu og atvinnu og þannig muni Djúpivogur stækka og dafna. Samhliða því sé ég fyrir mér að við getum aukið lífsgæði með aukinni þjónustu.

Leiðir til að mæta þessu eru meðal annars:

• Betri samgöngur - Öxi
• Betri hafnaraðstaða
• Miðbæjarskipulag
• Öflugri skóli - tónlistarkennsla
• Íþróttaaðstaða og félagsmál
• Störf án staðsetningar