Framboð í heimastjórn Fljótsdalshéraðs

Ég heiti Anna H. Bragadóttir og er fædd og uppalin á Fljótsdalshéraði. Samfélagið hér er mér mjög kært og því langar mig að bjóða fram krafta mína í heimastjórn á Fljótsdalshéraði.

Ég er gift Friðjóni Þórarinssyni og bjuggum við í um 40 ár á sveitabænum Flúðum þar sem við hjón ólum upp okkar börn, rákum sauðfjárbú, garðrækt, handverksmarkað, ferðaþjónustu o.fl. Ég sat um árabil í sveitastjórnum Tunguhrepps, Norður-Héraðs og Fljótsdalshéraðs og hef víðtæka reynslu af félagsmálum og nefndarstörfum og tel ég að sú reynsla og þekking muni nýtast mér vel hljóti ég umboð.

Einnig hef ég starfað um árabil á skrifstofu sveitarfélagsins og nú síðustu ár sem launafulltrúi hjá Múlaþingi. Ég er vinnusöm, skipulögð og réttsýn og mun leggja mig alla fram um að vera öflugur málsvari fyrir allt Fljótsdalshérað.

Ég heiti Guðný Drífa og er fædd árið 1981.

Ég hef verið varamaður í heimastjórn síðustu 4 ár og langar að bjóða mig fram til áframhaldandi starfa á þeim vettvangi.

Ég starfa sem söluráðgjafi hjá Sjóvá og bý á sauðfjárbýli í Fellum.

Ég er óflokksbundin og legg mig fram við að skoða jafnt allar hliðar á þeim teningum sem verið er að velta, sem ég tel kost í svona vinnu.

Ég brenn fyrir málefnum sveitarfélagsins og langar að leggja mitt af mörkum að gera gott sveitarfélag enn betra

Nafn mitt er Hafsteinn Jónasson kt. 300659-3149 og bý ég að Sólvöllum 5, Egilsstöðum. Ég er giftur Ágústu Björnsdóttur og á tvo syni, Viðar Örn og Jónas Ástþór. Ég er fæddur og uppalinn að Uppsölum í Eiðaþinghá á Fljótsdalshéraði og hef því búið á Fljótsdalshéraði alla mína tíð. Ég er húsasmíðameistari að mennt og hef unnið við það mest af mínum starfsferli, utan þess að ég vann sem tryggingaráðgjafi hjá VÍS í 16 ár og var fyrsti rekstrarstjóri Húsasmiðjunnar á Egilsstöðum þar áður. Ég hef starfað á vettvangi sveitarstjórnarmála, þ.e. í skipulags- og framkvæmdanefnd og tel þá reynslu mína nýtast vel í heimastjórn.

Ég hef áhuga á málefnum samfélagsins og vil leggja mitt af mörkum til að efla okkar góða samfélag enn frekar. Skipulagsmál eru mér hugleikin sem og atvinnumál og tel ég mig geta lagt þar gott til málanna vegna þekkingar minnar í þeim málaflokki og ekki síst þekkingar á málefnum bæði dreifbýlis og þéttbýlis. Einnig brenn ég fyrir fjölskyldu- og æskulýðsmál jafnt til sveita sem þéttbýlis. Ég er skipulagður og ósérhlífinn og tilbúinn að leggja í starf heimastjórnar þann tíma og kraft sem til þarf.

Kæru sveitungar á Fljótsdalshéraði,
Ég hef tekið þátt í mótun heimastjórnar fyrir Fljótsdalshérað síðastliðin sex ár og gef kost á mér til áframhaldandi setu í kosningum þann 16. maí næstkomandi.

Ég tel mikilvægt að efla heimastjórnir sveitarfélagsins til að þjóna hagsmunum íbúanna sem best. Einnig tel ég nauðsynlegt að fulltrúi dreifbýlis á Fljótsdalshéraði eigi setu í heimastjórn. Ég er giftur Ólöfu Ólafsdóttur, fæddur og uppalinn á Breiðavaði þar sem við tókum við búi árið 1980 og höfum starfað við það síðan.

Ég hef unnið lengi að félagsmálum og tel mig hafa haldgóða reynslu á því sviði. Ég er formaður Búnaðarsambands Austurlands og hef einnig starfað í mörgum nefndum félagasamtaka og sveitarfélaga. Þau verkefni sem eru mér hugleikin eru meðal annars landbúnaður, umhverfismál og skipulagsmál.

Ég hef ákveðið að gefa kost á mér til heimastjórnar. Ég heiti Þórlaug Alda Gunnarsdóttir, er 38 ára, fædd og uppalin á Egilsstöðum og hef setið í fjölskylduráði allt frá því fyrir sameiningu sveitarfélagsins.

Ég býð mig fram vegna þess að mér þykir vænt um samfélagið okkar og tel mikilvægt að rödd íbúa heyrist skýrt í þeim ákvörðunum sem hafa áhrif á framtíð svæðisins. Reynslan mín úr sveitarstjórnarmálum hefur kennt mér hversu mikilvægt það er að vinna af ábyrgð, hlusta á íbúa og hafa kjark til að taka afstöðu þegar þess þarf.

Heimastjórn á að vera sterk rödd fyrir samfélagið — ekki bara formsatriði. Ég vil leggja áherslu á opnari samskipti, skýra framtíðarsýn og að heimastjórnin nýti raunverulega það vald sem henni er falið í málum sem snúa að skipulagi, umhverfi, uppbyggingu og hagsmunum íbúa.

Ég kem inn í þetta með vilja til að vinna af heilindum, tala hreint út og standa vörð um hagsmuni samfélagsins okkar. Ég vona að ég fái stuðning ykkar í komandi kosningum.