Umsókn um framkvæmdaleyfi, Skógrækt 80ha, Davíðsstaðir

Undir þessum lið vakti Björgvin Steinar Pétursson athygli á vanhæfi sínu. Formaður úrskurðaði um augljóst vanhæfi. Björgvin vék af fundi við umfjöllun og afgreiðslu málsins. Sylvía Ösp Jónsdóttir kom inn í hans stað.

Fyrir umhverfis- og framkvæmdaráði liggur umsókn um framkvæmdaleyfi frá Yggdrasill Carbon ehf. vegna fyrirhugaðrar skógræktar í landi Davíðsstaða. Sótt er um leyfi til ræktunar á 80 ha skógi á landi sem í Aðalskipulagi Fljótsdalshéraðs 2008-2028 og gildandi deiliskipulagi frá árinu 2021 er skilgreint sem landbúnaðarsvæði.
Skipulagsfulltrúi situr fundinn undir þessum lið.

Eftirfarandi tillaga lögð fram:
Umhverfis og framkvæmdaráð lítur svo á að þrátt fyrir að í gögnum umsækjanda sé vísað til tveggja svæða, annars vegar skógrækt á 50 ha og hins vegar 80 ha svæði, að þá falli minna svæðið undir ákvæði gildandi deiliskipulags og hér sé tekin afstaða til skógræktar á 80 ha svæði til viðbótar.

Umhverfis- og framkvæmdaráð telur ekki ástæðu til að grenndarkynna fyrirhuguð áform á þeirri forsendu að svæðið er deiliskipulagt. Ráðið felur skipulagsfulltrúa að óska eftir umsögnum frá Náttúrufræðistofnun Íslands, Umhverfisstofnun, Vegagerðinni og Brunavörnum á Austurlandi.

Málið verður tekið fyrir að nýju þegar umsagnir liggja fyrir.

Samþykkt með 5 atkvæðum, 1 á móti (ÁMS).

Undir þessum lið vakti Björgvin Stefán Pétursson athygli á vanhæfi sínu. Formaður úrskurðaði um augljóst vanhæfi. Björgvin vék af fundi við umfjöllun og afgreiðslu málsins. Guðný Margrét Hjaltadóttir sat fundinn í hans stað.

Tekin er fyrir að nýju umsókn um framkvæmdaleyfi vegna skógræktar á 80 ha. í landi Davíðsstaða. Umsagnir ásamt viðbrögðum málsaðila liggja fyrir auk uppfærðrar ræktunaráætlunar dags. 31. maí 2023.

Eftirfarandi tillaga lögð fram:
Umhverfis- og framkvæmdaráð samþykkir að heimila skipulagsfulltrúa að gefa út framkvæmdaleyfi í samræmi við fyrirhuguð áform.

Samþykkt með 4 atkvæðum, 3 (ÁHB, ÁMS og HSÞ) á móti.

Fulltrúar L, V og M lista lögðu fram eftirfarandi bókun:
Við teljum nokkuð ljóst að skv. Aðalskipulag Fljótsdalshéraðs 2008-2028 og deiliskipulagi Davíðsstaða sé eingöngu gert ráð fyrir skógrækt á 50 ha. svæði á jörðinni.
Í skipulagsreglugerð 90/2013, gr. 2.7. segir: „Landgræðslu- og skógræktaráætlanir skulu vera í samræmi við gildandi skipulagsáætlanir“.
Það vekur því furðu okkar að ætlunin sé að gefa út framkvæmdaleyfi fyrir 80 ha til viðbótar við þá 50 ha sem kveðið er á um í gildandi skipulagsáætlunum svæðisins. Með því er gengið gegn skipulagsreglugerð og málið afgreitt þvert á álit lögfræðinga Skipulagsstofnunar og Múlaþings sem þó var óskað eftir ráðleggingum frá á fyrri stigum málsins.
Þó skógrækt til kolefnisbindingar sé án efa öflugt vopn gegn loftslagsvánni og framlögð gögn YGG, s.s. skógræktaráætlunin á Davíðsstöðum, séu til fyrirmyndar teljum við ekki rétt að pólitískir fulltrúar taki sér það vald að ganga gegn lögum og reglugerðum sem þeim ber að vinna eftir.