Víknaslóðir, leyfisbeiðni vegna viðbótar við leiðarkerfi

Heimastjórn lýsir ánægju með að ferðamálahópur Borgarfjarðar haldi áfram að huga að viðhaldi og auki við leiðarkerfi Víknaslóða fyrir göngu- og hjólafólk, enda sé full sátt við alla landeigiendur þar um og gerir ekki athugasemdir við beiðnina. Starfsmanni heimastjórnar falið að koma málinu í farveg.

Samþykkt samhljóða án atkvæðagreiðslu.

Eftirfarandi tillaga lögð fram:
Byggðaráð samþykkir að veita ferðamálahópi Borgarfjarðar leyfi fyrir sitt leyti til að halda áfram með uppbyggingu á leiðarkerfi Víknaslóða í landi Múlaþings fyrir göngu- og hjólafólk. Leyfi þarf að liggja fyrir frá öllum hlutaðeigandi landeigendum áður en framkvæmdir hefjast.

Samþykkt samhljóða án atkvæðagreiðslu.

Byggðaráð Múlaþings felur sviðsstjóra stjórnsýslu að koma á fundi milli landeiganda í Brúnavík, Árna Magnússonar og ferðamálahóps Borgarfjarðar svo hægt sé að ákvarða framhald verkefnisins. Málinu er einnig vísað til umfjöllunar hjá heimastjórn Borgarfjarðar með tilliti til náttúruverndarsjónarmiða.

Samþykkt samhljóða án atkvæðagreiðslu.

Samkvæmt reglugerð nr. 205/1973 um náttúruvernd er hlutverk náttúruverndarnefnda meðal annars að stuðla að náttúruvernd á sínu svæði og skulu þær fylgjast með því að náttúru landsins sé ekki spillt með athöfnum sem brjóta í bága við ákvæði og fyrirmæli laga. Þær eiga meðal annars að hafa gát á yfirvofandi akstri utan vega og umgengni í óbyggðum og stuðla að auknum möguleikum almennings til útivistar.
Fjallahjólreiðar njóta sívaxandi vinsælda sem útivistarmáti og ef vilji er til að stýra því hvar þær fara fram þarf að skipuleggja slíkar leiðir ellegar fara þær fram á leiðum sem eru ekki til þess búnar að bera slíka umferð. Heimastjórn stendur við fyrri bókun sína um málið þar sem hún gerir ekki athugasemdir fyrir sitt leyti við uppbyggingu fjallahjólaleiða á svæðinu svo fremi sem það verði gert í sátt við landeigendur svæðisins og Ferðafélag Fljótsdalshéraðs (ábyrgðaraðila gönguleiðanna) og framkvæmdin verði í samræmi við gildandi reglur og lög. Heimastjórn hefur engar valdheimildir til að leyfa slíka uppbyggingu og mun ekki beita sér fyrir henni nema samþykki landeigenda liggi fyrir.

Samþykkt samhljóða án atkvæðagreiðslu.