Heilsársvegur um Öxi

Ný lög um samvinnuverkefni í vegaframkvæmdum (PPP) voru samþykkt á Alþingi í júní 2020 en markmið laganna var að flýta uppbyggingu mikilvægra samgönguinnviða, stytta vegalengdir og auka umferðaröryggi.
Fram kemur í nýrri fjármálaáætlun til 2028 að ekki hafi reynst forsendur til að vinna samvinnuverkefni á borð við Axarveg á þeim grunni sem til stóð. Ráða þurfi fram úr fjármögnun og meta hvort sumar vegbæturnar ætti að kosta með hefðbundnum hætti.

Til máls tóku: Hildur Þórisdóttir, Jónína Brynjólfsdóttir, Helgi Hlynur Ásgrímsson, Berglind Harpa Svavarsdóttir, Þröstur Jónsson og Helgi Hlynur Ásgrímsson.

Eftirfarandi tillaga lögð fram:
Sveitarstjórn Múlaþings leggur áherslu á að unnið verði að framkvæmdum við heilsársveg um Öxi í samræmi við samgönguáætlun þó svo að fjármögnun í samstarfi við einkaaðila reynist ekki raunhæf leið. Í aðdraganda sameiningar Múlaþings var áhersla lögð á mikilvægi þess að af þessari framkvæmd yrði og voru viðbrögð ríkisvaldsins við því jákvæð enda bætir Axarvegur vegasamband á Austurlandi, styrkir byggð og eykur umferðaröryggi, en eins og Austfirðingar urðu áþreifanlega varir við nýverið er öryggi á þjóðvegi 1, Suðurfjarðarleið, verulega ábótavant í ljósi snjóflóða- og skriðuhættu.Einnig er um að ræða gífurlega mikilvæga bót á samgöngum og styttingu flutningsleiða Austurlands við aðra landshluta, og þar með minnkun kolefnislosunar, og því með öllu óásættanlegt að framkvæmdir frestist frekar en orðið hefur.

Samþykkt samhljóða með handauppréttingu.

Heimastjórn Djúpavogs beinir því til sveitarstjórnar að þess verði farið á leit við innviðaráðherra að taka vegaframkvæmdir við Öxi af lista PPP verkefna og að ríkið fjármagni framkvæmdina. Mikilvægt er að framkvæmdir hefjist strax á næsta ári og gerist þess þörf þá verði verkefninu áfangaskipt þannig að hægt verði að ljúka því á að hámarki þremur árum.

Heimastjórn bendir á að Axarvegur sé sá vegkafli á landinu sem fellur hvað best að markmiðum samgönguáætlunar um aukið öryggi, styttingu vegalengda, tengingu byggða og umhverfismál og því eðlilegt að fjármunum verði forgangsraðað í anda þess.

Samþykkt samhljóða

Fyrir liggur bókun frá fundi heimastjórnar Djúpavogs, dags. 04.04.2024, varðandi heilsársveg um Öxi.

Til máls tóku: Ívar Karl Hafliðason, Hildur Þórisdóttir, Eiður Gísli Guðmundsson, Berglind Harpa Svavarsdóttir, Eiður Gísli Guðmundsson, Helgi Hlynur Ásgrímsson, Þröstur Jónsson og Eyþór Stefánsson.

Eftirfarandi tillaga lögð fram:
Sveitarstjórn Múlaþings samþykkir að fara þess á leit við innviðaráðherra að taka vegaframkvæmdir við Öxi af lista PPP verkefna og að ríkið fjármagni framkvæmdina enda sé hún brýn samgöngubót og í samræmi við svæðisskipulag Austurlands 2022-2044. Mikilvægt er að framkvæmdir hefjist strax á næsta ári og gerist þess þörf þá verði verkefninu áfangaskipt þannig að hægt verði að ljúka því á að hámarki þremur árum. Jafnframt tekur sveitarstjórn Múlaþings undir ábendingu heimastjórnar Djúpavogs varðandi þá staðreynd að Axarvegur sé sá vegkafli á landinu sem fellur hvað best að markmiðum samgönguáætlunar um aukið öryggi, styttingu vegalengda, tengingu byggða og umhverfismál og því eðlilegt að fjármunum verði forgangsraðað í anda þess.

Sveitarstjóra falið að koma á fundi með ráðherra til að fylgja málinu eftir.

Samþykkt samhljóða með handauppréttingu.

9.219 bílar fóru um Axarveg í maí, samkvæmt umferðartölum Vegagerðarinnar.
Í ljósi þess telur heimastjórn Djúpavogs nauðsynlegt að veginum sé sinnt betur og að bæta þurfi fjarskipti á veginum, en hann er að stórum hluta með mjög takmörkuðu símasambandi. Víða vantar orðið ofaníburð og vegurinn hefur ekki verið heflaður frá því að hann var opnaður.

Heimastjórn fagnar því að unnið sé í undirbúningi á uppbyggingu á heilsársvegi yfir Öxi.

Heimastjórn áréttar þó fyrri bókanir sínar um að farið verði í uppbyggingu á þessum 20 km vegi sem allra fyrst og bendir á að á síðasta ári (2024) hafi tæplega 100 þúsund bílar ekið yfir Öxi.

Heimastjórn beinir því til sveitastjórnar að taka málið upp á næsta fundi og þrýsta á nýjan ráðherra samgöngumála að koma uppbyggingu á Axarvegi á dagskrá sem allra fyrst.

Samþykkt samhljóða.

Fyrir liggur bókun frá fundi heimastjórnar Djúpavogs, dags. 09.01.2025, varðandi uppbyggingu heilsársvegar um Öxi.

Til máls tóku: Ívar Karl Hafliðason, Þröstur Jónsson og Einar Freyr Guðmundsson.

Eftirfarandi tillaga lögð fram:
Sveitarstjórn Múlaþings tekur undir með heimastjórn Djúpavogs varðandi mikilvægi þess að farið verði í uppbyggingu heilsársvegar um Öxi sem allra fyrst og verður málið tekið fyrir á fyrirhuguðum fundi fulltrúa sveitarfélagsins með ráðherra samgöngumála á næstunni.

Samþykkt samhljóða með handauppréttingu.

Heimastjórn vill árétta fyrri bókanir um miklvægi Axarvegar og að það sé nauðsynlegt að ráðist verði í framkvæmdir á heilsársvegi nú þegar.
Umferð úm Axarveg frá áramótum til ágústloka er nálgt 80 þúsund bílum þrátt fyrir að lítil sem engin vetrarþjónusta hafi verið á tímabilinu janúar til apríl. umferðarþynsti dagurinn taldi 880 bíla.
Meðalumferð frá 1. júní til 24. ágúst var 623 bílar. Aukning á umferð um Öxi á tveimur árum er yfir 35%
Marga daga er umferð um Öxi meiri en um þjóðveg 1 við Streitishvarf.

Heimastjórn sýnist það einsýnt að öllu lengur sé ekki hægt að bíða eftir framkvæmdum vegna síaukinnar umferðar og það sé ljóst að mjór og illa viðhaldinn malarvegur dugi ekki til að anna þessari umferð.

Einnig vill heimastjórn árétta að viðhald sé í lágmarki og því vegurinn oft á köflum holóttur og erfiður yfirferðar, en þrátt fyrir það þá sé hann að verða umferðaþyngsti vegurinn milli Djúpavogs og miðausturlands og það kalli á tafarlausr úrbætur.

Samþykkt samhljóða.

Heimastjórn Djúpavogs harmar að enn á ný sé verið að fresta framkvæmdum við þennan mikilvæga veg. Vinna við heilsársveg á Öxi hefjist ekki að neinu marki fyrr en eftir 2030 og að einungis 25% af fjármagni í veginn komi inn á fyrsta áfanga samgönguáætlunar (2027-2029). Ekkert fé sé tilgreint á árinu 2030 og um 6,6 milljarðar færist á annað tímabil áætlunarinnar (2031-2035).

Þessi niðurstaða er algjörlega óásættanleg, vegurinn er fullhannaður, er einn hættulegasti vegkafli landsins og nauðsynleg tenging milli byggðarlaga í Múlaþingi og styttir hringveginn um tæpa 70 km. Einnig má benda á að umferð um þennan veg er sívaxandi - og mjór og hlykkjóttur malarvegur ber ekki lengur þá umferð sem fer um veginn á hverju ári og er oft meiri en um þjóðveg 1. Sennilega eru fáir malarvegir á landinu með meiri umferðarþunga en Axarvegur.

Heimastjórn krefst þess að nú þegar verði ráðist í framkvæmdir og að verkinu ljúki á fyrsta tímabili samgönguáætlunar eða fyrir árslok 2030.

Samþykkt samhljóða.