Umsagnarbeiðni um Samgönguáætlun fyrir árin 2026 til 2040 ásamt fimm ára aðgerðaáætlun fyrir árin 2026 til 2030

Eftirfarandi tillaga lögð fram:
Byggðaráð Múlaþings felur sveitarstjóra að gera drög að umsögn um Samgönguáætlun fyrir árin 2026 til 2040 og fá álit heimastjórna á henni. Umsögnin verður tekin fyrir á næsta fundi byggðaráðs.

Samþykkt samhljóða án atkvæðagreiðslu.

Eftirfarandi tillaga lögð fram:
Umhverfis- og framkvæmdaráð samþykkja fyrir sitt leyti umsögnina er varðar hafnamál, í samræmi við umræður á fundinum.
Ráðið felur sveitastjóra að skila inn umsögn.

Samþykkt samhljóða.

Eftirfarandi tillaga lögð fram:
Byggðaráð Múlaþings samþykkir fyrirliggjandi drög að umsögn í samræmi við umræður á fundinum en óskar jafnframt eftir umsögnum heimastjórnanna. Sveitarstjóra falið að ganga frá umsögn sveitarfélagsins þegar umsagnir heimastjórna liggja fyrir.

Samþykkt samhljóða án atkvæðagreiðslu.

Byggðaráð samþykkti á fundi sínum 3. febrúar síðastliðinn drög að umsögn en óskaði jafnframt eftir umsögnum heimastjórnanna.

Heimastjórn samþykkir að fela starfsmanni heimastjórnar að taka saman minnisblað um þau atriði sem snerta Borgarfjörð í áætluninni, til dæmis vetrarþjónustu, sjóvarnir og Hafnarveg.

Samþykkt samhljóða án atkvæðagreiðslu.

Eftirfarandi tillaga lögð fram:
Heimastjórn samþykkir fyrir sitt leiti umsögn sveitarfélagsins við samgönguáætlun fyrir árin 2026-2040 og fimm ára aðgerðaáætlun fyrir árin 2026-2030. Heimastjórn tekur heilshugar undir þær kröfur að Fjarðarheiðargöng verði sett aftur í þann forgang sem þau höfðu í gildandi samgönguáætlun, tekin inn á fyrsta framkvæmdatímabil og boðin út án frekari tafa, enda eru þau fullhönnuð, tilbúin til útboðs og lykilforsenda öryggis, þjónustu og hringtengingar Austurlands.

Samþykkt samhljóða með handauppréttingu.

Heimastjórn vill benda á í tengslum við samgönguáætlun að á síðasta ári óku 106.554 bílar yfir Öxi samkvæmt tölum Vegagerðarinnar sem er 17% aukning frá fyrra ári. Mesta umferðin var í ágúst, 21.108 bílar, að meðaltali 681 bíll á sólarhring.

Miðað við síaukna umferð er ljóst að sú ákvörðun að meirihluti framkvæmda við þennan veg sé á 2. tímabili samgönguáætlunar séu mistök. Vegurinn er fullhannaður, auðvelt er að áfangaskipta verkinu og klára hann á 3-4 árum og því vel hægt að hefjast handa 2026 og ljúka verkinu 2030.

Heimastjórn minnir á að ein af forsendum sameiningar sveitarfélaga í Múlaþing á sínum tíma var sú að endurbætur á Axarvegi færu af stað strax, til að tryggja greiðar heilsárssamgöngur milli byggðarlaga í hinu nýja sveitarfélagi. Í þessu samhengi má benda á að tæplega 30 ungmenni stunda nám við Menntaskólann á Egilsstöðum frá Djúpavogi.

Framkæmdir á Axarvegi falla að mati heimastjórnar mjög vel að megin áherslum Samgönguáætlunar hvað varðar öryggi, styttingu leiða og byggðarþróun.

Einnig vill heimastjórn Djúpavogs benda á að á starfssvæði sínu séu 6 einbreiðar brýr, eða ein brú á 13 km fresti að jafnaði og tímabært sé að fækka þeim hraðar en ráð er fyrir gert í samgönguáætlun.

Einnig lýsir heimastjórn furðu sinni á því að fyrirhugaðar framkvæmdir við Djúpavogshöfn sem er verið að vinna að sé hvergi á áætlun.

Heimastjórn felur starfsmanni að koma athugasemdum á framfæri við viðeigandi aðila.

Samþykkt samhljóða.

Eftirfarandi tillaga lögð fram:
Heimastjórn Fljótsdalshéraðs felur starfsmanni að koma viðbótum við drög að umsögn um samgönguáætlun í ferli í samræmi við umræður á fundinum.

Samþykkt samhljóða með handauppréttingu.

Til máls tóku: Jónína Brynjólfsdóttir, Pétur Heimisson, Berglind Harpa Svavarsdóttir, Ívar Karl Hafliðason, Eyþór Stefánsson, Þröstur Jónsson, Helgi Hlynur Ásgrímsson, Hildur Þórisdóttir, Einar Freyr Guðmundsson, Vilhjálmur Jónsson, Berglind Harpa Svavarsdóttir, Ívar Karl Hafliðason, Þröstur Jónsson sem beindi fyrirspurn til Berglindar Hörpu, Berglind Harpa Svavarsdóttir sem svaraði Þresti, Helgi Hlynur Ásgrímsson, Þröstur Jónsson sem veitti andsvar.

Eftirfarandi tillaga lögð fram:
Múlaþing telur að tillaga að samgönguáætlun, eins og hún liggur fyrir, endurspegli ekki með fullnægjandi hætti stöðu Austurlands né það þjóðhagslega hlutverk sem landshlutinn gegnir. Í áætluninni skortir stórar framkvæmdir á Austurlandi á fyrsta framkvæmdatímabili, þrátt fyrir að svæðið standi undir verulegri verðmætasköpun, alþjóðlegum samgöngugáttum og mikilvægum öryggisinnviðum.
Sveitarfélagið leggur sérstaka áherslu á eftirfarandi atriði:
- Að Fjarðarheiðargöng verði sett aftur í þann forgang sem þau höfðu í gildandi samgönguáætlun, tekin inn á fyrsta framkvæmdatímabil og boðin út án frekari tafa, enda eru þau fullhönnuð, tilbúin til útboðs og lykilforsenda öryggis, þjónustu og hringtengingar Austurlands.
- Að Axarvegi verði flýtt og lögð fram raunhæf tímasetning framkvæmda, endurmat á PPP-fyrirkomulagi og tafarlaus hækkun þjónustustigs vegarins, þar sem vegurinn gegnir lykilhlutverki í innri tengingum Múlaþings og styttir leiðir innan sveitarfélagsins og milli landshluta.
- Að fyrirhuguð lækkun á kostnaðarhlutdeild ríkisins í hafnarframkvæmdum verði endurskoðuð, með hliðsjón af þjóðhagslegu hlutverki hafna á Austurlandi, einkum Seyðisfjarðarhafnar sem einu alþjóðlegu ferjuhafnar landsins, og þeirri tekjuþróun sem blasir við höfnum Múlaþings á næstu árum.

Múlaþing telur brýnt að samgönguáætlun verði aftur það faglega og fyrirsjáanlega stjórntæki sem sveitarfélög og atvinnulíf geta treyst til lengri tíma. Endurteknar breytingar á forgangsröðun samgönguáætlunar, án skýrra og gagnsærra raka, grafa undan trausti og torvelda markvissa uppbyggingu í landshlutum utan höfuðborgarsvæðisins.

Samþykkt samhljóða með handauppréttingu.