Heimastjórn Djúpavogs

Heimastjórn vill benda á í tengslum við samgönguáætlun að á síðasta ári óku 106.554 bílar yfir Öxi samkvæmt tölum Vegagerðarinnar sem er 17% aukning frá fyrra ári. Mesta umferðin var í ágúst, 21.108 bílar, að meðaltali 681 bíll á sólarhring.

Miðað við síaukna umferð er ljóst að sú ákvörðun að meirihluti framkvæmda við þennan veg sé á 2. tímabili samgönguáætlunar séu mistök. Vegurinn er fullhannaður, auðvelt er að áfangaskipta verkinu og klára hann á 3-4 árum og því vel hægt að hefjast handa 2026 og ljúka verkinu 2030.

Heimastjórn minnir á að ein af forsendum sameiningar sveitarfélaga í Múlaþing á sínum tíma var sú að endurbætur á Axarvegi færu af stað strax, til að tryggja greiðar heilsárssamgöngur milli byggðarlaga í hinu nýja sveitarfélagi. Í þessu samhengi má benda á að tæplega 30 ungmenni stunda nám við Menntaskólann á Egilsstöðum frá Djúpavogi.

Framkæmdir á Axarvegi falla að mati heimastjórnar mjög vel að megin áherslum Samgönguáætlunar hvað varðar öryggi, styttingu leiða og byggðarþróun.

Einnig vill heimastjórn Djúpavogs benda á að á starfssvæði sínu séu 6 einbreiðar brýr, eða ein brú á 13 km fresti að jafnaði og tímabært sé að fækka þeim hraðar en ráð er fyrir gert í samgönguáætlun.

Einnig lýsir heimastjórn furðu sinni á því að fyrirhugaðar framkvæmdir við Djúpavogshöfn sem er verið að vinna að sé hvergi á áætlun.

Heimastjórn felur starfsmanni að koma athugasemdum á framfæri við viðeigandi aðila.

Samþykkt samhljóða.

Heimastjórn Djúpavogs tekur undir það sem fram kemur í þingsályktunartillögunni um mikilvægi þess að framkvæmdir við heilsársveg yfir Öxi hefjist sem fyrst.

Heimastjórn felur starfsmanni að auglýsa eftir tillögum að samfélagsverkefnum.

Samþykkt samhljóða.

Heimastjórn Djúpavogs mótmælir harðlega áformum um sölu á fasteigninni Steinum 1, sem skráð er sem prestsbústaður kirkjunnar á Djúpavogi. Sala eignarinnar myndi fela í sér varanlega skerðingu á þjónustu við íbúa svæðisins og ganga þvert á gildandi skipulag Austfjarðaprestakalls.

Heimastjórn byggir afstöðu sína á eftirfarandi staðreyndum:

1.Skýr búsetuskylda: Á opinberri vefsíðu Austfjarðaprestakalls er kveðið á um að „búsetuskylda er á Fáskrúðsfirði, Djúpavogi og í Heydölum“. Núverandi staða, þar sem enginn prestur hefur aðsetur á Djúpavogi, er því frávik frá eigin reglum kirkjunnar.

2.Nauðsynlegir innviðir: Til að uppfylla ofangreinda búsetuskyldu er nauðsynlegt að kirkjan eigi húsnæði á staðnum. Að selja eina embættisbústaðinn á svæðinu er í reynd yfirlýsing um að leggja eigi embættið niður eða flytja það varanlega í burtu.

3.Íbúafjöldi og þjónusta: Djúpivogur er fjölmennasti byggðakjarninn á suðursvæði prestakallsins. Það er óásættanlegt að þjónusta við rúmlega 400 íbúa sé háð færð og veðri frá Breiðdal.
Heimastjórn krefst þess að fallið verði frá sölu hússins og að Kirkjuráð tryggi að næsta staða prests í prestakallinu verði auglýst með skyldubúsetu á Djúpavogi, í samræmi við stofnskrá og reglur prestakallsins. Viðvera prests er mikið hagsmunamál fyrir öryggi og velferð íbúa á Djúpavogi.

Starfsmanni falið að koma athugasemdum heimastjórnar á framfæri og kalla fulltrúa Austfjarðaprófasts inn á næsta fund.

Samþykkt samhljóða.

Heimastjórn þakkar sveitarstjóra fyrir góða kynningu.

Vegna breytinga á úthlutunarskilyrðum Fiskeldissjóðs, þarf að sækja um í stærri verkefni en verið hefur og þau þurfa að vera á fjárhagsáætlun 2026.
Heimastjórn líst vel á hugmyndir að umsóknum.

Samþykkt samhljóða.