Klifurhátíð á Seyðisfirði 2026

Eftir frábæra hátíð árið 2024 er komið að næstu veislu. Þessi hátíð verður svipuð - við stefnum aftur á 25 stiga hita og bongóblíðu, mikið klifur og framúrskarandi félagsskap.

Saunan og varðeldur verður á sínum stað, sem og Seyðfirskt bakkelsi og slackline stund. Við verðum með lokapartý á Öldunni á laugardagskvöldinu þar sem DJ Ívar Pétur úr FM Belfast heldur uppi stuðinu.
Í þetta skiptið ætlum við að hafa lengdarmetrakeppni í klifrinu og við bindum vonir við að Kilter-veggurinn okkar verði tilbúinn svo allir ættu að geta spreytt sig á honum líka.

Í ár mun þá hátíðin vera aðeins lengri, á fimmtudeginum stefnum við á að bjóða upp á fjallgöngu á einn af tignarlegum tindum fjarðarins, ef nægur áhugi er fyrir hendi. Á föstudeginum verður hlaupahópur um morguninn fyrir klifur. Til viðbótar verður frábær viðburður fyrir yngstu þátttakendurnar, en Ívar Pétur ætlar að vera með Baby-rave og við verðum með ýmsa leiki og skemmtun fyrir þau samhliða því. Á laugardeginum verður yoga-upphitun með óvæntu tvisti fyrir klifrið.

Seyðisfjörður hefur óþrjótandi möguleika til útivistar af ýmsum toga og því ættu allir gestir að finna eitthvað við sitt hæfi.

Tjaldsvæðið er staðsett í hjarta bæjarins með sturtum, salerni og þjónustuhúsi með eldunaraðstöðu. Stutt er í fjölda veitingastaða, bakarí og sundlaug.

Við fáum sérstakan afslátt á gistingunni og mun skráning fara fram hjá okkur Jafet fyrirfram sem og greiðsla.

Í ár mun þátttaka kosta 3000 kr á hvern fullorðinn einstakling. Með því getum við gert hátíðina enn veglegri. Öll vinna fer fram í sjálfboðavinnu af okkar hálfu og allt fjármagn fer beint í að gera upplifunina sem besta.

Áhugasöm eru hvött til að koma fyrr og setja upp leiðir í firðinum, nú eða vera lengur. Frekari upplýsingar um leiðauppsetningu veitir Jafet Bjarkar.

*Varahelgi verður næsta helgi þar á eftir, 16-19 júlí 2026.
** Varavara helgi er þar á eftir 23-26 júlí 2026