Umsagnarbeiðni um frumvarp til laga um veiðigjald (aflaverðmæti í reiknistofni), 351. mál

Eftirfarandi tillaga lögð fram:
Byggðaráð Múlaþings tekur undir ábendingar Samtaka sjávarútvegssveitarfélaga varðandi vanmat á hækkun veiðigjalda og hve víðtæk áhrifin af breytingunni geta orðið á einstök sveitarfélög. Mörg sjávarútvegsfyrirtæki eru með heimilisfesti í einu sveitarfélagi en mikla starfsemi í öðrum sveitarfélögum. Þá er einnig ljóst að afleidd áhrif gætu orðið mikil á sveitarfélög ef sjávarútvegsfyrirtækin draga úr stuðningi við nærsamfélög sín vegna breytinganna. Ef til frekari samþjöppunar kemur í greininni vegna frumvarpsins geta sveitarfélög orðið af útsvarstekjum og fasteignagjöldum. Mikilvægt er að meta til fulls áhrif á lítil samfélög á landsbyggðinni og innleiða breytingarnar í skrefum. Þá hefur skort á samráð við sveitarfélög í þessu ferli og greiningarvinnu af hendi ríkisins á áhrifum á einstök sveitarfélög.
Í greinargerð sem fylgir frumvarpinu er fullyrt að breytingarnar sem eru lagðar til muni ekki hafa verulega neikvæð áhrif á rekstrarumhverfi fyrirtækja sem greiða veiðigjöld og þar af leiðandi muni frumvarpið ekki hafa neikvæð áhrif á fjárhag sveitarfélaga. Það er þvert á það sem segir í greiningu sem Samtök sjávarútvegssveitarfélaga fékk KPMG til að gera um möguleg áhrif frumvarpsins á einstök sveitarfélög en af henni má vera ljóst að áhrifin geta orðið veruleg ef samþjöppun verður í greininni vegna veiðigjaldahækkana.
Við teljum þessa tillögu bera vott um skort á skilningi á mikilvægi sjávarútvegs fyrir byggðafestu og stöðugleika í íslensku efnahagslífi. Hækkun veiðigjalda að þessu marki gæti ekki aðeins haft áhrif á rekstrarforsendur fyrirtækja og samspil veiða og vinnslu, heldur einnig á fjölda samfélaga vítt og breitt um landið.

Samþykkt með þremur atkvæðum, tveir á móti (ES,HHÁ)

Fulltrúar V lista (HHÁ) og L lista (ES) lögðu fram eftirfarandi bókun:
Fulltrúar V og L lista fagna leiðréttingu veiðigjalda enda eðlilegt að sjávarútvegurinn greiði sanngjarnt gjald fyrir aðgengi sitt að fiskistofnum þjóðarinnar. Við beinum því jafnframt til ríkisstjórnarinnar að fjármagnið sem með þessu fæst verði sett í innviðauppbyggingu á landsbyggðinni enda koma gjöldin að mestu leyti frá fyrirtækjum á landsbyggðinni. Arðgreiðslur fyrirtækja hafa almennt ekki áhrif á frárhag sveitafélaga.

Fulltrúi M lista (ÞJ) lagði fram eftirfarandi bókun:
Ég sem áheyrnarfulltrúi án atkvæðisréttar styð bókun meirihlutans.