Ferðakostnaður barna í Múlaþingi

Málsnúmer 202604039

Sveitarstjórn Múlaþings - 67. fundur - 15.04.2026

Fyrir liggur áskorun frá KSÍ til yfirvalda íþróttamála, sveitarfélaga, ÍSÍ og UMFÍ, sem samþykkt var á ársþingi KSÍ sem fram fór á Egilsstöðum þann 28. febrúar 2026. Í henni var lýst verulegum áhyggjum af þeirri staðreynd að börn á landsbyggðinni búi við skert jafnrétti til íþróttaiðkunar vegna ferðakostnaðar, vinnutaps foreldra og fjarveru barna frá námi.

Til máls tóku: Björg Eyþórsdóttir, Ásrún Mjöll Stefánsdóttir, Hildur Þórisdóttir, Ívar Karl Hafliðason, Jónína Brynjólfsdóttir.

Eftirfarandi tillaga lögð fram:
Sveitarstjórn Múlaþings tekur undir áskorun Knattspyrnusambands Íslands um að grípa þurfi til markvissra aðgerða til að jafna aðstöðumun barna og ungmenna til íþróttaiðkunar, óháð búsetu.
Sveitarstjórn telur ljóst að hér sé um kerfislægt misrétti að ræða sem er óásættanlegt.

Íþróttaiðkun barna er ekki munaður heldur grundvallarþáttur í lýðheilsu, félagslegri þátttöku og uppbyggingu samfélaga. Þegar fjölskyldur standa frammi fyrir milljónakostnaði vegna þátttöku barna sinna í íþróttum er ljóst að jafnræði barna er ekki tryggt.

Sveitarstjórn skorar á stjórnvöld að taka höndum saman við íþróttahreyfinguna og sveitarfélög um að tryggja raunhæfan og markvissan stuðning við ferðakostnað barna og ungmenna vegna íþróttaiðkunar. Það er ekki ásættanlegt að búseta barna á Íslandi ráði því hvort þau hafi raunhæfa möguleika á að taka þátt í íþróttum.

Sveitarstjóra er falið að koma bókun þessari á framfæri við viðeigandi ráðherra.

Samþykkt samhljóða með handauppréttingu.