Loftbrú 2026

Eftirfarandi tillaga lögð fram:

Byggðaráð Múlaþings mótmælir harðlega boðuðum breytingum á Loftbrú, sem fela í sér að 40% afslætti af flugfargjöldum verði skipt út fyrir fasta niðurgreiðslu að fjárhæð 7.000 eða 9.000 krónur á hvern fluglegg.

Innanlandsflug er nauðsynlegur þáttur í samgöngum fyrir íbúa Múlaþings og annarra byggðarlaga fjarri höfuðborgarsvæðinu. Langar vegalengdir, vetraraðstæður og langur ferðatími á landi gera flug oft að eina raunhæfa kostinum til að sækja nauðsynlega þjónustu á höfuðborgarsvæðið.

Byggðaráð telur að ráðleggingar um að bóka flug með lengri fyrirvara taki ekki nægilega mið af aðstæðum þeirra sem þurfa að sækja nauðsynlega þjónustu utan heimabyggðar. Íbúar ráða oft litlu um tímasetningu rannsókna, aðgerða eða viðtala hjá sérfræðingum. Þá geta veikindi, áföll og brýn fjölskylduerindi kallað á ferðalög með skömmum fyrirvara.

Byggðaráð leggur áherslu á að ríkið beri ábyrgð á að tryggja íbúum raunhæft aðgengi að þeirri þjónustu sem það veitir ekki í heimabyggð. Samþjöppun opinberrar þjónustu á höfuðborgarsvæðinu má ekki leiða til sífellt meiri ferðakostnaðar fyrir íbúa landsbyggðarinnar. Þá er mikilvægt að ríkisstjórnin setji og fjármagni byggðarstefnu sem miðar að því að halda blómlegri byggð í öllu landinu.

Með fastri 7.000 til 9.000 króna niðurgreiðslu bera heimilin að fullu kostnað af hækkunum flugfargjalda og stuðningurinn rýrnar hlutfallslega eftir því sem verð hækkar. Slík breyting felur því í sér aukna kostnaðarbyrði fyrir íbúa landsbyggðarinnar og dregur úr raunverulegu aðgengi þeirra að nauðsynlegri þjónustu.

Byggðaráð leggur jafnframt áherslu á að stjórnvöld efli og fjármagni uppbyggingu opinberrar þjónustu á landsbyggðinni. Tryggja þarf að íbúar hafi sem bestan aðgang að heilbrigðisþjónustu, stjórnsýslu og annarri nauðsynlegri þjónustu í heimabyggð, þannig að draga megi úr þörf fyrir kostnaðarsamar ferðir til höfuðborgarsvæðisins.

Byggðaráð Múlaþings krefst þess að innviðaráðherra falli frá breytingunum, viðhaldi að minnsta kosti 40% afslætti og tryggi fjármögnun Loftbrúar í samræmi við raunverulega nýtingu. Þá fer byggðaráð fram á að innanlandsflug verði skilgreint sem almenningssamgöngur.

Byggðaráð felur sveitarstjóra að koma bókuninni á framfæri við innviðaráðherra ásamt stjórn Sambands sveitarfélaga á Austurlandi.

Samþykkt samhljóða án atkvæðagreiðslu.