Brottfarartíma áætlunarferða milli Egilsstaða og Djúpavogs hefur verið breytt eftir að góðar ábendingar bárust sveitarfélaginu varðandi tengingu við flug um Egilsstaðaflugvöll.
Rútan mun stoppa við flugstöðina í tengslum við komu „kaffivélarinnar“ frá Reykjavík sem lendir klukkan 15:35 á föstudögum og sunnudögum. Rútan leggur af stað til Djúpavogs klukkan 16:00.
Brottför frá Djúpavogi verður klukkan 17:30 frá Bjargstúni á meðan Öxi er greiðfær og áætlaður komutími á Egilsstaðaflugvöll um klukkan 19:00. Kvöldvélin til Reykjavíkur fer klukkan 19:45.
Brottfarartími frá Djúpavogi verður klukkan 18:10 í vetur þegar fara þarf um firðina.
Alla jafna eru ferðirnar á föstudögum og sunnudögum en brottfarardagar koma fram á akstursdagatali sem tekur mið af skóladagatali Menntaskólans á Egilsstöðum.
Frekari upplýsingar um ferðirnar og almenningssamgöngur í Múlaþingi má finna á heimasíðu Múlaþings.
Stutt um ferðirnar:
- Ferðirnar eru fyrst og fremst hugsaðar fyrir nemendur við Menntaskólann á Egilsstöðum frá Djúpavogi.
- Ferðirnar eru opnar fyrir öll en nemendur við ME njóta forgangs.
- Um er að ræða tilraunaverkefni til eins árs eða yfir skólaár ME 2026 – 27.
