Dagar myrkurs hefjast í dag og standa fram til 1. nóvember. Fjöldi smárra sem stórra viðburða verður í boði um allt Austurland.
Dagar myrkurs er sameiginleg byggðahátíð Austurlands sem haldin er ár hvert síðustu vikuna í október. Markmið hátíðarinnar er að draga fram tækifærin sem felast í myrkrinu og skapa vettvang fyrir ímyndunarafl, samveru og fjölbreyttar upplifanir.
Íbúar, félagasamtök, fyrirtæki og stofnanir hafa tekið höndum saman og útkoman er fjölbreytt dagskrá þar sem áhersla er lögð á samveru og upplifun. Meðal viðburða má nefna sögustund við varðeld á vegum Bókasafns Múlaþings á Egilsstöðum, draugagöngu og hryllings zumba á Djúpavogi, leit að Jólanadda og Jólaskottu á Borgarfirði, myrkraþrautir í Tjarnargarðinum á Egilsstöðum og margt fleira.
Hægt er að nálgast upplýsingar um viðburði í Múlaþingi í viðburðadagatalinu á vef sveitarfélagsins og upplýsingar um viðburði á öðrum stöðum á Austurlandi má nálgast á á vefnum east.is.
