Í sumar hefur verið unnið að því að bæta aðgengi og aðkomu gesta að minjasvæðinu í landi Fjarðar á Seyðisfirði. Framkvæmdum er að mestu lokið og fram undan er að bæta upplýsingagjöf á svæðinu.
Árið 2021 hófst fornleifarannsókn í landi Fjarðar á Seyðisfirði í tengslum við byggingu snjóflóðavarnargarða undir Bjólfi. Rannsóknin, sem unnin var af Antikva og leidd af Ragnheiði Traustadóttur fornleifafræðingi, varð á endanum afar umfangs- og þýðingarmikil en hún leiddi í ljós mannvistarleifar frá 10. og fram á 20. öld, fjögur kuml og einstakan fjölda gripa.
Kumlin fjögur fundust haustið 2021 undir skriðu sem fallið hefur í kringum árið 1100. Þar var um að ræða bátskuml, kvenkuml, hestskuml og karlkuml með hesti. Fjöldinn allur af gripum fannst í kumlunum en þar bar einna hæst einstakar textílleifar sem fundust í kvenkumlinu. Sumarið eftir komu svo í ljós mannvirki frá tveimur tímaskeiðum, annars vegar skáli, útihús og vefjarstofa frá 940-1100 og hins vegar miðaldabyggingar frá 1100-1300.
Uppgreftri lauk árið 2024 og síðan þá hefur verið unnið að úrvinnslu rannsóknarinnar ásamt því að gera minjarnar um skálann aðgengilegar almenningi. Ofanflóðasjóður lét gera áningarstað með bílastæðum í nágrenni svæðisins þar sem skálinn fannst og þar verða einnig upplýsingaskilti. Frá bílastæðunum liggur göngustígur upp að skálanum en stígurinn tengist einnig stíg sem liggur upp á snjóflóðavarnargarðana.
Minjastofnun Íslands stóð að frágangi á skálanum sjálfum en vinnan var í höndum Fornverks ehf. sem sérhæfir sig í fornum byggingaraðferðum. Veggir skálans voru hlaðnir að hluta þannig að auðvelt er nú að átta sig á húsaskipan en jafnframt stendur til að koma upp skiltum sem skýra enn betur það sem fyrir augu ber.
Minjasvæðið er nú þegar orðinn vinsæll áfangastaður heimafólks og ferðamanna sem heimsækja Seyðisfjörð og mun uppbyggingin sem ráðist hefur verið í bæta upplifun þeirra til muna.
