Heimastjórn Borgarfjarðar

Fyrir liggur til kynningar fjárhagsáætlun Múlaþings 2026 til 2029. Inn á fundinn undir þessum lið kom Guðlaugur Sæbjörnsson, fjármálastjóri.

Fyrir liggja drög að fundadagatali sveitarstjórnar, fagráða og heimastjórna tímabilið janúar til júlí 2026.

Fyrir liggur minnisblað frá deildarstjóra menningarmála og fulltrúa sveitarstjóra á Borgarfirði varðandi málefni Lindarbakka auk draga að samningi milli Múlaþings og Minjasafns Austurlands um faglega umsjón með húsinu.

Byggðaráð bókaði á fundi sínum 18. nóvember síðastliðinn að vísa málinu til umsagnar hjá heimastjórn Borgarfjarðar og umhverfis- og framkvæmdaráði og mun taka málið fyrir að nýju þegar umsagnir liggja fyrir.

Fyrirhuguð er endurskoðun á 10 ára húsnæðisáætlun sveitarfélagsins og liggur fyrir minnisblað með helstu breytingum sem áætlaðar eru á henni.

Fyrir liggur til kynningar fundargerð dagsett 26. nóvember síðastliðinn frá fyrsta verkfundi Vegagerðarinnar, Hafna Múlaþings og Úlfsstaða ehf. vegna endurbyggingar gömlu löndunarbryggjunnar í bátahöfninni við Hafnarhólma.

Erindi barst frá Önnu Hannesdóttur 30. október síðastiliðinn vegna breytinga á lóðinni Sæbóli á Borgarfirði.

Fyrir liggur bréf frá Degi Skírni Óðinssyni, dagsett 14. október 2025 með hvatningu um að sett verði upp hraðhleðslustöð fyrir rafbíla á Borgarfirði.

Samkvæmt samningi um rekstur Hafnarhúss skal heimastjórn funda með leigutaka einu sinni á ári. Auður Vala Gunnarsdóttir eigandi Blábjarga ehf. sem rekur Hafnarcafe í Hafnarhúsi, átti ekki heimangengt en átti fund með fulltrúa sveitarstjóra á Borgarfirði 26. nóvember sl.

Heimastjórn átti fund með Sigurjóni Þórðarsyni, formanni atvinnuveganefndar Alþingis 10. október sl. vegna stöðu atvinnumála á Borgarfirði en ýmsar blikur eru á lofti; Íslenskur dúnn ehf., hefur flutt starfsemi sína til Reykjavíkur og aðgerðir stjórnvalda í sjávarútvegi og ferðaþjónustu hafa þegar haft og munu halda áfram að hafa neikvæð áhrif á kjarnaatvinnuvegi staðarins. Þá er fyrirsjáanlegt að aðrar boðaðar aðgerðir stjórnvalda muni einnig bitna á byggðalaginu.

Málinu frestað til næsta fundar.

Endurbygging gömlu löndunarbryggjunnar hefst eftir áramót, eins og fram hefur komið. Verktaki stefnir á að hefja forvinnu strax eftir áramót á starfsstöð sinni á Seyðisfirði, þ.e. forsmíða steypumót og járnabinda allt í undirstöðum og landvegg. Efnið verður svo flutt á Borgarfjörð. Fyrstu verkefni á Borgarfirði verða að fjarlægja gömlu þekjuna af bryggjunni, jarðvinna, fleygun staura og staurarekstur. Nánari dagsetningar verða kynntar síðar. Afhending á harðviði í bryggjugólf verður væntanlega í apríl 2026.
Viðbúið er að eigendur báta sem bundnir eru við löndunarbryggjuna þurfi að færa sig tímabundið um set vegna framkvæmdanna. Fulltrúi sveitarstjóra verður í nánara sambandi við þá eftir áramót vegna þessa.

Framkvæmdum er að ljúka í Fjarðarborg en þær hófust veturinn 2023. Verið er að ljúka við að klæða húsið og snurfusa innanhúss. Helstu breytingar eru að skipt hefur verið um alla glugga, inngangur í húsið verið færður til, lyftu sem stoppar á öllum fimm hæðum hússins komið fyrir, stigi færður og salerni fyrir fatlaða útbúið. Þá var aftur opnað fyrir glugga í stóra salnum og húsið málað að innan. Innréttingar í eldhúsi voru einnig endurnýjaðar að nokkru leyti og skipulagi þess breytt. Á efri hæð hússins er nú nýtt og bjart skrifstofurými fyrir u.þ.b. átta til tíu manns, kaffistofa fyrir hæðina og salerni, sem ekki var áður, og líkamsræktaraðstaða UMFB. Þá er búið að setja upp loftræstikerfi og brunakerfi í húsinu. Verklok eru um áramót. Enn á þó eftir að klára frágang í kjallara undir sviði þar sem leki kom upp síðastliðið vor, sem og að endurnýja salerni á neðri hæð en það bíður betri tíma.

Með bættri starfsaðstöðu í Fjarðarborg hefur starfsfólki á skrifstofu Múlaþings á Borgarfirði fjölgað úr einum í þrjá en í október hófu störf Anna Margrét Jakobsdóttir Hjarðar á umhverfis- og framkvæmdasviði og Þórunn Ólafsdóttir á fjölskyldusviði. Þá hafa verið gerðar breytingar á skipulagi í þjónustumiðstöð og hefur verkstjóri þjónustumiðstöðvar á Egilsstöðum nú einnig umsjón með þjónustumiðstöð á Borgarfirði. Auglýst hefur verið eftir starfskrafti í þjónustumiðstöð á Borgarfirði og rann umsóknarfresturinn út 24. nóvember.

Í Fjarðarborg geta framhalds- og háskólanemar einnig tekið sín lokapróf og verða þó nokkur slík þreytt á næstu vikum.
Vilji einstaklingar og/eða fyrirtæki kanna möguleika á að nýta skrifstofuaðstöðuna í Fjarðarborg, hvort sem er um lengri eða skemmri tíma er velkomið að hafa samband við fulltrúa sveitarstjóra. Verðskrá er að finna á þessari slóð: https://www.mulathing.is/is/stjornsysla/fjarmal/gjaldskrar#fjardarborg

Jólaskreytingar voru settar upp í vikunni fyrir fyrsta sunnudag í aðventu en um helgina var Jóladagurinn haldinn í fimmta sinn en hann er framtak íbúa og fyrirtækjaeigenda á Borgarfirði til að lyfta íbúum og nágrönnum á Stór-Borgarfjarðarsvæðinu upp í skammdeginu. Frábær skemmtun og fjölbreytt og hafi aðstandendur bestu þakkir fyrir alla sína vinnu.

Rekstur tjaldsvæðisins á Borgarfirði verður boðinn út á næstu vikum og verður auglýst sérstaklega.

Heilbrigðiseftirlit Austurlands tók sýni úr neysluvatni mánudaginn 24. nóvember síðastliðinn og kom sú mæling mjög vel út. Samkvæmt upplýsingum frá HEF veitum er þó seinkun á uppsetningu gegnumlýsingartækis við vatnstankinn vegna tafa við að koma upp nýju tæknirými þar. Lögð er áhersla á að því verði lokið í vor.

Fræðslufundir um varmadælur verða haldnir í Múlaþingi á næstu vikum fyrir tilstilli Austurbrúar og Orkustofnunar. Á Borgarfirði verður slíkur fundur haldinn fimmtudaginn 8. janúar 2026 kl. 12 í Fjarðarborg.

Lagt fram til kynningar.

Næsti fundur heimastjórnar Borgarfjarðar verður á nýju ári, fimmtudaginn 8. janúar 2026. Erindi fyrir fundinn þurfa að berast fyrir kl. 12:00 mánudaginn 5. janúar. Erindi skal senda á netfangið alda.kristinsdottir@mulathing.is eða bréfleiðis til skrifstofu.

Innviðaráðherra kynnti í gær, 3. desember, tillögu til þingsályktunar um samgönguáætlun fyrir árin 2026-2040 ásamt fimm ára aðgerðaáætlun fyrir árin 2026-2030.