Já sæll, árlegur fundur

Fyrir liggur erindi frá rekstraraðilum Já sæll ehf. í Fjarðarborg þar sem óskað er eftir að fyrirtækið fái niðurfellda leigu fyrir sumarið 2024, í ljósi ástands hússins það sumar. Fyrirtækið lagði í umtalsverðan kostnað, bæði við frágang eldhúss og alþrif á húsinu svo rekstur gæti hafist. Forsvarsmenn lögðu fram reikninga því til staðfestingar. Einnig ákveðið að endurskoða núgildandi leigusamning um Fjarðarborg sem er frá 2011.

Heimastjórn felur starfsmanni að leggja drög að nýjum leigusamningi í samræmi við umræður á fundinum og leggur til við byggðaráð að vinnuframlag og kostnaður Já sæll ehf. vegna framkvæmda og þrifa sumarið 2024 komi til frádráttar frá leigugreiðslum þess árs. Starfsmanni falið að taka saman gögn varðandi málið.

Samþykkt samhljóða án atkvæðagreiðslu.

Fyrir liggur bókun frá fundi heimastjórnar Borgarfjarðar, dags. 09.01.2025, varðandi erindi frá rekstraraðilum Já sæll ehf. í Fjarðarborg. Alda Marín Kristinsdóttir situr fundinn undir þessum lið.

Í upphafi máls þessa liðar vöktu Helgi Hlynur Ásgrímsson og Eyþór Stefánsson máls á mögulegu vanhæfi sínu vegna tengsla við málsaðila. Bar formaður (BHS) upp vanhæfistillögu vegna HHÁ sem var samþykkt samhljóða. Formaður (BHS) bar síðan upp vanhæfistillögu vegna tengsla ES, sem var samþykkt með 4 atkvæðum, einn sat hjá (HHÁ). Yfirgáfu HHÁ og ES fundinn undir þessum lið.

Eftirfarandi tillaga lögð fram:
Byggðaráð Múlaþings samþykkir tillögu heimastjórnar Borgarfjarðar um að lækka leigu Já Sæll ehf. vegna ársins 2024 um 750 þúsund vegna þeirra þátttöku í framkvæmdum í Fjarðaborg á síðasta ári samkvæmt framlögðum gögnum.

Samþykkt samhljóða án atkvæðagreiðslu.