Breytt ábyrgðarskipting, samkomulag við ríkið varðandi börn með fjölþættan vanda

Eftirfarandi tillaga lögð fram:
Byggðaráð Múlaþings lýsir yfir þungum áhyggjum og andstöðu við útgefna reglugerð mennta- og barnamálaráðuneytisins er varðar þjónustu við börn með fjölþættan vanda.

Byggðaráð telur það með öllu óásættanlegt að ráðuneytið hafi einhliða þrengt skilgreininguna á þeim hópi sem reglugerðin tekur til. Með þessari ráðstöfun er vegið alvarlega að grunni þess samkomulags sem ríki og sveitarfélög undirrituðu 19. mars 2025, þar sem skýrt var kveðið á um breytta ábyrgðarskiptingu þar sem ríkið skyldi taka að sér framkvæmd og fjármögnun sérhæfðrar þjónustu við þennan viðkvæma hóp barna.

Byggðaráð Múlaþings lýsir yfir fullum stuðningi við baráttu Sambands íslenskra sveitarfélaga í málinu og krefst þess að mennta- og barnamálaráðuneytið endurskoði eða afturkalli umrædda reglugerð án tafar, og sett verði ný reglugerð sem samræmist í hvívetna efni og anda samkomulagsins frá 19. mars 2025.

Sveitarstjóra falið að koma bókun þessari á framfæri við mennta- og barnamálaráðuneytið.

Samþykkt samhljóða án atkvæðagreiðslu.