Erindi, byggingarleyfisumsókn Kaldvíkur á Seyðisfirði og strandssvæðisskipulag austfjarða

Eftirfarandi tillaga lögð fram:
Umhverfis- og framkvæmdaráð sér ekki ástæðu til að bóka um málið, enda er málið í farvegi hjá því stjórnvaldi sem fer með forræði í slíkum málum, en sveitarfélagið hefur veitt umsagnir þegar eftir því hefur verið óskað.

Samþykkt með 5 atkvæðum, 2 á móti (GB V-lista og ÁMS V-lista).


Fulltrúar V-lista, Glúmur Björnsson og Ásrún Mjöll Stefánsdóttir, geta ekki tekið undir að nægilegt sé að vísa til þess að málið sé í farvegi hjá öðru stjórnvaldi. Tillaga að rekstrarleyfi var auglýst 12. desember 2024 og athugasemdafrestur rann út 20. janúar 2025. Samkvæmt lögum bar Matvælastofnun að taka ákvörðun innan fjögurra vikna frá lokum þess frests, en leyfisferlinu er enn ólokið.

Frá staðfestingu strandsvæðaskipulagsins hafa jafnframt komið fram ný gögn og veruleg álitaefni um valkostagreiningu og umhverfismat, ofanflóðahættu og slysasleppingar, netlög og lögvarin réttindi, auk þess sem gögn byggingarleyfismála hafa tekið breytingum. Veðurstofan hefur m.a. staðfest að hætta á slysasleppingum vegna ofanflóða hafi ekki verið sérstaklega metin í hættumatinu.

Sveitarfélaginu er samkvæmt 14.gr. laga nr. 88/2018 sérstaklega heimilt að kalla eftir endurskoðun strandsvæðaskipulags og strandsvæðaskipulag nær samkvæmt lögunum frá netlögum ekki inn fyrir þau. Þegar uppi eru rökstudd álitaefni um að fyrirhuguð starfsemi og takmarkanir henni tengdar nái inn á netlög verður sveitarfélagið að okkar mati að gæta eigin hagsmuna en bíða ekki bara afgreiðslu annars stjórnvalds.