Umhverfis- og framkvæmdaráð Múlaþings

Fyrir umhverfis- og framkvæmdaráði liggja drög að uppfærðu erindisbréfi vegna starfshóps um myndun tillagna að loftslagsstefnu Múlaþings, ásamt tilnefningum í starfshópinn.

Eftirfarandi tillaga lögð fram:
Umhverfis- og framkvæmdaráð samþykkir fyrirliggjandi drög að erindisbréfi fyrir starfshópinn. Jafnframt samþykkir ráðið eftirfarandi fulltrúa í hópinn:
Ívar Hafliðason fyrir hönd D-lista sem verður jafnframt formaður starfshópsins
Guðrún Ásta Friðbertsdóttir fyrir hönd B-lista
Guðrún Schmidt fyrir hönd V-lista
Ásdís Hafrún Benediktsdóttir fyrir hönd L-lista
Þröstur Jónsson fyrir hönd M-lista og
Unnar Aðalsteinsson fyrir hönd ungmennaráðs.

Jafnframt mun fulltrúi frá öldunaráði Múlaþings sitja í hópnum og verður hann tilgreindur um leið og tilnefning berst.

Samþykkt samhljóða.

Fyrir umhverfis- og framkvæmdaráði liggur að skipa nýjan fulltrúa í verkefnisstjórn um gerð svæðisáætlunar um meðhöndlun úrgangs fyrir Austurland í stað Ólafs Áka Ragnarssonar.

Eftirfarandi tillaga lögð fram:
Umhverfis- og framkvæmdaráð samþykkir að skipa Björgvin Stefán Pétursson, fulltrúa D-lista, í verkefnisstjórnina.

Samþykkt samhljóða.

Fyrir umhverfis- og framkvæmdaráði liggur skipulags- og matslýsing fyrir breytingu á Aðalskipulagi Seyðisfjarðarkaupstaðar 2010-2030, dagsett 8. desember 2022. Lýsingin nær til stækkunar á hafnarsvæði Seyðisfjarðar ásamt nýju deiliskipulagi svæðisins auk breytinga á deiliskipulagi Fjarðarhafnar, Pálshúsreits og Öldunnar.
Skipulagsfulltrúi sat fundinn undir þessum lið.

Eftirfarandi tillaga lögð fram:
Umhverfis- og framkvæmdaráð samþykkir að leggja til við sveitarstjórn að fyrirliggjandi skipulags- og matslýsing verði kynnt samkvæmt 1. mgr. 30. gr. skipulagslaga nr. 123/2010.

Samþykkt samhljóða.

Fyrir umhverfis- og framkvæmdaráði liggur tillaga til auglýsingar, dagsett 13. desember 2022, fyrir breytingu á Aðalskipulagi Fljótsdalshéraðs 2008-2028 vegna náma við nýjan Axarveg. Vinnslutillaga breytinganna var kynnt frá 28. september með athugasemdafresti til 20. október 2022. Umsagnir og athugasemdir sem bárust á kynningartíma gáfu ekki tilefni til verulegra breytinga á tillögunni og eru þær lagðar fram hér til kynningar.
Skipulagsfulltrúi sat fundinn undir þessum lið.

Eftirfarandi tillaga lögð fram:
Umhverfis- og framkvæmdaráð samþykkir að vísa því til sveitarstjórnar að fyrirliggjandi tillaga verði auglýst samkvæmt 31. gr. skipulagslaga nr. 123/2010.

Samþykkt samhljóða.

Úrskurðarnefnd umhverfis- og auðlindamála kvað þann 25. nóvember sl. upp úrskurð í máli nr. 65/2022 er varðaði kæru á ákvörðun byggingarfulltrúa Múlaþings að synja beiðni um að beitingu þvingunarúrræða vegna íbúðar í húsinu að Kaupvangi 6. Í gildandi aðalskipulagi er ekki fjallað um íbúðir á miðsvæði Egilsstaða. Því er hin umdeilda íbúð ekki í samræmi við skipulagsáætlun svæðisins. Þótt í deiliskipulagi sé gert ráð fyrir íbúðum á svæðinu þá er það ekki nægilegt, þar sem deiliskipulagið verður að vera í samræmi við aðalskipulag. Í miðbæjarskipulaginu er gert ráð fyrir fjölda íbúða á svæðinu sem er samkvæmt þessum úrskurði ekki í samræmi við gildandi aðalskipulag.
Skipulagsfulltrúi sat fundinn undir þessum lið.

Eftirfarandi tillaga lögð fram:
Umhverfis- og framkvæmdaráð samþykkir að leggja til við sveitarstjórn að gerð verði breyting á Aðalskipulagi Fljótsdalshéraðs 2008-2028 sem geri ráð fyrir íbúðum á miðsvæði þéttbýlisins og þeirri uppbyggingu sem gert er ráð fyrir í deiliskipulagi miðbæjar Egilsstaða.

Samþykkt samhljóða.

Fyrir umhverfis- og framkvæmdaráði liggur skipulagslýsing, dagsett 8. desember 2022, vegna nýs deiliskipulags fyrir smávirkjun við Gestreiðarstaðaháls. Það er Neyðarlínan ohf. sem hefur lagt fram fyrirliggjandi gögn í tengslum við uppsetningu á smávirkjun í Langadalsá til þess að framleiða 50-60kW af rafmagni til þess að knýja meðal annars fjarskiptastöð á Gestreiðarhálsi.
Skipulagsfulltrúi sat fundinn undir þessum lið.

Eftirfarandi tillaga lögð fram:
Umhverfis- og framkvæmdaráð samþykkir að leggja til við heimastjórn Fljótsdalshéraðs að fyrirliggjandi skipulagslýsing verði kynnt í samræmi við 1. mgr. 40. gr. skipulagslaga nr. 123/2010.

Samþykkt samhljóða.

Fyrir umhverfis- og framkvæmdaráði liggur vinnslutillaga, dagsett 15. desember 2022, vegna breytinga á miðbæjarskipulagi Egilsstaða fyrir Miðvang 8. Tillagan felur meðal annars í sér stækkun lóðarinnar um 93 m2, breytingu á byggingarreit og hámarksbyggingarmagni.
Skipulagsfulltrúi sat fundinn undir þessum lið.

Eftirfarandi tillaga lögð fram:
Umhverfis- og framkvæmdaráð samþykkir að leggja til við heimastjórn Fljótsdalshéraðs að fyrirliggjandi vinnslutillaga verði kynnt í samræmi við 43. gr. skipulagslaga nr. 123/2010.

Samþykkt samhljóða.

Fyrir umhverfis- og framkvæmdaráði liggur að nýju erindi vegna fyrirhugaðra byggingaráforma við Furuvelli 11 á Egilsstöðum. Grenndarkynningu áformanna lauk þann 15. desember án athugasemda.
Skipulagsfulltrúi sat fundinn undir þessum lið.

Eftirfarandi tillaga lögð fram:
Umhverfis- og framkvæmdaráð staðfestir að grenndarkynningu sé lokið án athugasemda.

Samþykkt samhljóða.

Fyrir umhverfis- og framkvæmdaráði liggja drög að rammahluta aðalskipulags fyrir Stuðlagil. Gert er ráð fyrir að tillaga til auglýsingar verði lögð fram til samþykktar í janúar.
Skipulagsfulltrúi sat fundinn undir þessum lið.

Lagt fram til kynningar.

Lögð er fram til kynningar matsáætlun um allt að 500 MW vindorkugarð í landi Klaustursels í Múlaþingi. Samkvæmt 21. gr. laga um umhverfismat framkvæmda og áætlana nr. 111/2021 og 12. gr. reglugerðar nr. 1381/2021 um umhverfismat framkvæmda og áætlana hefur Skipulagsstofnun óskað eftir umsögn sveitarfélagsins um matsáætlunina.
Skipulagsfulltrúi sat fundinn undir þessum lið.

Lagt fram til kynningar.

Fyrir umhverfis- og framkvæmdaráði liggja drög að endurskoðaðri 10 ára húsnæðisáætlun Múlaþings fyrir árið 2023.

Eftirfarandi tillaga lögð fram:
Umhverfis- og framkvæmdaráð samþykkir fyrirliggjandi drög að húsnæðisáætlun Múlaþings og vísar henni til kynningar hjá heimastjórnum og staðfestingar hjá sveitarstjórn.

Samþykkt samhljóða.

Framkvæmda- og umhverfismálastjóri fer yfir drög að þriggja ára áætlun í gatnagerð.

Lagt fram til kynningar.