Fara í efni

Heimastjórn Seyðisfjarðar - íbúafundur

Málsnúmer 202110029

Vakta málsnúmer

Heimastjórn Seyðisfjarðar - 16. fundur - 11.10.2021

Heimastjórn leggur fram eftirfarandi svör við spurningum íbúa og beinir því til sveitasstjórnar að verða við þeim tilmælum sem þar koma fram.

Fundamenn spurðu hvort það kæmi til greina að halda íbúakosningu um fiskeldið á Seyðisfirði. Lagalega séð getur íbúakosning ekki komið í veg fyrir fyrirætlanir um fiskeldi í Seyðisfirði. Heimastjórn leggur áherslu á að efnt verði til kynningarfundar fyrir íbúa Seyðisfjarðar sem fyrst og á þeim tíma sem íbúar geti almennt sótt hann. Mikilvægt er að fyrirtækið fari yfir fjölda starfa og þá möguleika sem uppbygging fiskeldis í firðinum getur haft í för með sér.

Ofanflóðamál voru mikið rædd og íbúar á hættusvæðum voru uggandi yfir stöðu sinni. Sveitastjórnin hefur staðið sig vel í gegnum áföllin sem dunið hafa yfir Seyðfirðinga. Heimastjórn hvetur sveitastjórn til þess að halda áfram því góða starfi í samstarfi við ofanflóðasérfræðinga og að standa þannig vörð um íbúa á Seyðisfirði. Heimastjórn áréttar að vanda þurfi til rýminga og að tryggt sé að íbúar fái skilvirkar upplýsingar þegar það þarf að yfirgefa hús sín.

Mikil umræða varð um hitaveitumál Seyðisfjarðar og hvort einhver lausn væri í sjónmáli varðandi það mál. Heimastjórn óskar eftir því að það mál verði skoðað sérstaklega og beinir því til umhverfis- og framkvæmdaráðs sem og sveitastjórnar að skoðað verði með varanlega lausn til framtíðar fyrir Seyðisfjörð.

Umræða var um framkvæmdir og hversu seint þær ganga og hvers vegna verktakar á Seyðisfirði væru ekki ráðnir til vinnu. Rætt var einnig um rusl í bænum og að það þyrfti að fara í tiltektarátak. Heimastjórn beinir því til Umhverfis- og framkvæmdaráðs að farið verði í úttekt á ástandinu og skerpt verði á verkferlum í framkvæmdum.

Byggðaráð Múlaþings - 35. fundur - 19.10.2021

Fyrir lá bókun fundar heimastjórnar Seyðisfjarðar, dags. 11.10.2021, þar sem komið er á framfæri ábendingum er fram komu á íbúafundi á Seyðisfirði 30.09.2021.

Eftirfarandi tillaga lögð fram:
Byggðaráð Múlaþings tekur undir mikilvægi þess að haldinn verði sem fyrst kynningarfundur fyrir íbúa Seyðisfjarðar um fyrirætlanir varðandi fiskeldi í Seyðisfirði. Sveitarstjóra falið að koma þessu á framfæri við forsvarsaðila fyrirhugaðs fiskeldis.

Hvað varðar ofanflóðamál þá er unnið að því af hálfu sveitarfélagsins að afla og koma á framfæri við íbúa frekari upplýsingum varðandi uppbyggingu varna til framtíðar. Jafnframt er unnið að því að bæta verkferla og upplýsingagjöf í tengslum við mögulegar rýmingar.

Samþykkt samhljóða.

Umhverfis- og framkvæmdaráð Múlaþings - 35. fundur - 20.10.2021

Fyrir umhverfis- og framkvæmdaráði liggur bókun frá fundi heimastjórnar Seyðisfjarðar dags. 11. október 2021 varðandi niðurstöður frá íbúafundi sem haldinn var í félagsheimilinu Herðubreið 30. september 2021.
Fyrir ráðinu liggur að taka til umræðu málefni af fundinum er varða hitaveitumál, stöðu og verklag við framkvæmdir í bænum auk umhverfisásýndar.

Eftirfarandi tillaga lögð fram:
Umhverfis- og framkvæmdaráð telur brýnt að sem fyrst verði mótuð framtíðarstefna um fyrirkomulag húshitunar á Seyðisfirði. Mikilvægt er að sem fyrst verði hafnar viðræður við RARIK um málið og telur ráðið rétt að sveitarstjóri Múlaþings leiði þá vinnu. Jafnframt telur ráðið skynsamlegt að sveitarfélagið feli HEF Veitum að gera úttekt á mismunandi húshitunarkostum á Seyðisfirði og vísar þeirri tillögu til byggðarráðs til skoðunar.
Tillögum frá íbúafundi er varða ásýnd og umhirðu í bænum er vísað til undirbúningsvinnu við hreinsunarátak næsta árs og til nýs garðyrkjustjóra sveitarfélagsins.

Samþykkt samhljóða með handauppréttingu.

Heimastjórn Seyðisfjarðar - 17. fundur - 08.11.2021

Heimastjórn fagnar því að helstu mál íbúafundarins hafi verið tekin fyrir hjá Byggðaráði og Umhverfis- og framkvæmdaráði. Málefni hitaveitunnar, fiskeldis, umgengni um bæinn, verkferlar varðandi framkvæmdir og ofanflóðamál eru komin í feril. Sjá má bókanir á 35. fundi byggðaráðs og 35. fundi Umhverfis- og framkvæmdaráðs.
Var efnið á síðunni hjálplegt?