Umsagnarbeiðni. Umhverfismatsskýrsla, Vindmyllur við Lagarfossvirkjun

Eftirfarandi tillaga lögð fram:
Heimastjórn Fljótsdalshéraðs samþykkir fyrirliggjandi drög að umsögn verkefnastjóra skipulagsmála, en vill jafnframt að fram komi í umsögninni að heimastjórn telji að áformin muni hafa mikil neikvæð sjónræn áhrif víða á Fljótsdalshéraði, og einnig verði hljóðræn áhrif verulega neikvæð á nærsvæði. Heimastjórn bendir jafnframt á að samkvæmt samantekt umhverfisáhrifa í matsskýrslu séu öll atriði metin neikvæð.

Heimastjórn Fljótsdalshéraðs leggst gegn fyrirliggjandi áformum um uppbyggingu vindmylla við Lagarfoss.

Samþykkt samhljóða með handauppréttingu.

Lagt fram til kynningar.


Fulltrúar V-lista leggja fram eftirfarandi bókun:
VG og óháð taka undir þær athugasemdir sem fram koma í umsögn heimastjórnar Fljótsdalshéraðs um umhverfismatsskýrslu vegna fyrirhugaðra vindtúrbína við Lagarfossvirkjun, meðal annars varðandi skort á heildstæðu mati á verndargildi svæðisins, samfélagsáhrifum og samráði við íbúa áhrifasvæðisins.

VG og óháð telja þó að ganga þurfi lengra í mati á áhrifum framkvæmdarinnar, sérstaklega með tilliti til áhrifa á fuglalíf innan mikilvægs fuglasvæðis á Úthéraði, samlegðaráhrifa annarra fyrirhugaðra orkuframkvæmda og áhrifa á landslag, víðerni og náttúruupplifun á Austurlandi.

Með vísan til varúðarreglu náttúruverndar telja VG og óháð að veruleg óvissa sé enn til staðar um umhverfisáhrif framkvæmdarinnar og leggjast því gegn fyrirhugaðri uppbyggingu. VG og óháð munu jafnframt skila inn sérstakri umsögn þar sem þessi sjónarmið verða útlistuð.