Byggðaráð Múlaþings

Eftirfarandi tillaga lögð fram:
Í forsendum fjárhagsáætlunar 2027 er gert ráð fyrir eftirfarandi álagningarhlutföllum fasteignaskatts, samanber 3. grein laga um tekjustofna sveitarfélaga, og lóðarleigu:

- Íbúðarhúsnæði (A-flokkur): 0,43% af fasteignamati húss og lóðar. Var 0,45%.
- Opinbert húsnæði (B-flokkur): 1,32% af fasteignamati húss og lóðar. Óbreytt.
- Atvinnuhúsnæði (C-flokkur): 1,60% af fasteignamati húss og lóðar. Var 1,625%.
- Lóðarleiga: 0,75% af fasteignamati leigulóða. Óbreytt.

Samkvæmt þessu lækkar álagningarhlutfall á íbúðarhúsnæði um 0,02 prósentustig og á atvinnuhúsnæði um 0,025 prósentustig. Hlutföll á opinbert húsnæði og lóðarleiga haldast óbreytt.

Samþykkt með fjórum atkvæðum, einn sat hjá (HHÁ).

Málið áfram í vinnslu.

Eftirfarandi tillaga lögð fram:
Byggðaráð Múlaþings þakkar Skúla og Bjarna fyrir góða kynningu og komuna á fundinn.

Byggðaráð fagnar áhuga Rótarýklúbbs Héraðsbúa á að taka að sér umsjón með viðhaldi, aðkomu og merkingu minnisvarða á Fljótsdalshéraði. Um er að ræða að minnsta kosti þrjá minnisvarða: um Pál Ólafsson við Hallfreðarstaði, um Jóhann Magnús Bjarnason í Meðalnesi og Kvennavörðuna á Egilsstöðum. Minnisvarðarnir eru hluti af sögu og menningararfi svæðisins.

Deildarstjóra menningarmála er falið að gera drög að samkomulagi um verkefnið í samráði við Rótarýklúbbinn. Þar komi fram hlutverk og verkaskipting aðila og hvort og þá hvernig sveitarfélagið komi að verkefninu. Drögin verði lögð fyrir byggðaráð til afgreiðslu.

Samþykkt samhljóða án atkvæðagreiðslu.

Eftirfarandi tillaga lögð fram:
Byggðaráð Múlaþings þakkar Ragnhildi og Óðni Gunnari fyrir komuna á fundinn og kynningu á erindinu.

Byggðaráð tekur jákvætt í að fjármunum verði varið til kaupa á búnaði í sal á efri hæð Sláturhússins og telur jafnframt mikilvægt að hugað verði að búnaði í öðrum sölum í eigu sveitarfélagsins. Erindinu er vísað til fjárhagsáætlunargerðar.

Samþykkt samhljóða án atkvæðagreiðslu.

Eftirfarandi tillaga lögð fram:
Byggðaráð Múlaþings þakkar Golfklúbbi Fljótsdalshéraðs fyrir erindið og felur sviðsstjóra framkvæmda að skoða málið áfram í samráði við klúbbinn. Málið verði lagt að nýju fyrir byggðaráð að þessari vinnu lokinni.

Samþykkt samhljóða án atkvæðagreiðslu.

Málinu er frestað til næsta fundar.

Eftirfarandi tillaga lögð fram:
Byggðaráð Múlaþings samþykkir að selja Skaftfelli, menningarmiðstöð myndlistar á Austurlandi, fasteignina að Öldugötu 14 á Seyðisfirði, fastanúmer 216-8907, fyrir 16 milljónir króna. Sveitarstjóra falið að ganga frá kaupsamningi um eignina.

Samþykkt samhljóða án atkvæðagreiðslu.

Eftirfarandi tillaga lögð fram:
Byggðaráð Múlaþings tekur undir áhyggjur heimastjórnar Seyðisfjarðar og starfsfólks Heilbrigðisstofnunar Austurlands af aðstöðu sjúkrabíls á Seyðisfirði. Það er óásættanlegt að sjúkrabíllinn standi utandyra árið um kring. Seyðisfjörður býr við krefjandi vetraraðstæður og samgöngur yfir Fjarðarheiði eru oft erfiðar. Við þær aðstæður getur aðstöðuleysið hamlað aðgengi að bílnum og seinkað viðbragði. Það stefnir öryggi íbúa og sjúklinga í hættu og fer auk þess illa með bílinn og búnað hans.

Byggðaráð skorar á heilbrigðisráðuneytið að tryggja án tafar fjármagn til að byggja eða útvega viðunandi sjúkraskýli á Seyðisfirði.

Sveitarstjóra falið að koma bókuninni á framfæri við heilbrigðisráðuneytið.

Samþykkt samhljóða án atkvæðagreiðslu.

Eftirfarandi tillaga lögð fram:
Byggðaráð Múlaþings mótmælir fyrirhuguðum breytingum á skipulagi lögreglu sem fela í sér að sjálfstætt lögregluembætti á Austurlandi verði lagt niður og það sameinað embættum á Suðurlandi og í Vestmannaeyjum. Með því færist yfirstjórn löggæslu í landshlutanum langt frá íbúum og út fyrir Norðausturkjördæmi.

Í Múlaþingi eru tvær af mikilvægustu gáttum landsins við umheiminn: millilandaferjuhöfnin á Seyðisfirði og Egilsstaðaflugvöllur, sem er einnig varaflugvöllur fyrir millilandaflug. Landamæraeftirlit er því stór hluti af verkefnum lögreglunnar á svæðinu. Reynslan af náttúruvá, meðal annars skriðuföllunum á Seyðisfirði, hefur sýnt hve mikilvægt er að þekking á staðháttum, skýr ábyrgð og stjórnun almannavarna séu í heimabyggð.

Sveitarfélög á Austurlandi hafa lengi kallað eftir fleiri lögreglumönnum, betri búnaði og öflugra landamæraeftirliti. Byggðaráð telur að fækkun embætta og breytt skipurit svari ekki þeim þörfum. Fjarlægðir og verkefni hverfa ekki við sameiningu. Yfirlýsingar um óbreyttan fjölda starfsstöðva tryggja ekki staðbundið ákvörðunarvald. Áður en lengra er haldið þurfa að liggja fyrir skýrar upplýsingar um valdheimildir, mannafla, fjármögnun og stjórnun almannavarna. Einnig þarf að eiga raunverulegt samráð við sveitarfélög og viðbragðsaðila.

Byggðaráð telur að tenging Austurlands við Suðurland og Vestmannaeyjar samræmist illa landfræðilegum aðstæðum og þjónustutengslum. Verði umdæmaskipan breytt er eðlilegra að horfa til Norðurlands.

Byggðaráð krefst þess að fallið verði frá áformunum. Þess í stað verði löggæsla á Austurlandi efld með auknum mannafla, betri búnaði og fjárveitingum sem endurspegla umfang verkefnanna, og stjórnun og ákvörðunarvald haldist í landshlutanum.

Byggðaráð vísar málinu til stjórnar Sambands sveitarfélaga á Austurlandi og hvetur til þess að sveitarfélögin á Austurlandi komi fram með sameiginlega afstöðu gagnvart dómsmálaráðuneytinu.

Samþykkt samhljóða án atkvæðagreiðslu.

Eftirfarandi tillaga lögð fram:
Byggðaráð Múlaþings leggur ríka áherslu á að almenningssamgöngur innan sveitarfélagsins og á Austurlandi öllu séu góðar, áreiðanlegar og vel tengdar. Múlaþing er víðfeðmt sveitarfélag með nokkra byggðakjarna og góðar almenningssamgöngur skipta miklu máli til að íbúar komist til vinnu, í nám og til að sækja þjónustu, þar á meðal heilbrigðisþjónustu.

Byggðaráð hvetur Vegagerðina til að hafa gott samráð við sveitarfélagið og Samband sveitarfélaga á Austurlandi um skipulag og þróun almenningssamgangna á svæðinu og lýsir sig reiðubúið til samstarfs um úrbætur.

Samþykkt samhljóða án atkvæðagreiðslu.

Eftirfarandi tillaga lögð fram:
Byggðaráð Múlaþings þakkar Heilbrigðiseftirliti Austurlands fyrir ársskýrsluna. Byggðaráð þakkar jafnframt starfsfólki HAUST og heilbrigðisnefnd Austurlands fyrir vel unnin störf í þágu íbúa og atvinnulífs á svæðinu.

Með lögum sem Alþingi samþykkti í júní 2026 verða heilbrigðisnefndir sveitarfélaga lagðar niður. Eftirlit með hollustuháttum og mengunarvörnum færist til Umhverfis- og orkustofnunar og matvælaeftirlit til nýrrar Stofnunar atvinnuveganna. Byggðaráð ítrekar þær áhyggjur af framkvæmd breytinganna sem komu fram í bókun ráðsins 15. september 2026. Nú eru rúmir tveir mánuðir til gildistöku og enn ríkir mikil óvissa um afdrif starfa og verkefna. Hætta er á að sérfræðistörfum fækki á landsbyggðinni, að kostnaður hækki hjá þeim sem sæta eftirliti og að þjónusta skerðist. Auk þess flytjast verkefni á fleiri stofnanir, sem eykur flækjustig.

Byggðaráð leggur áherslu á að sérfræðistörf í heilbrigðiseftirliti verði áfram á Austurlandi og að þjónusta við íbúa og fyrirtæki á svæðinu skerðist ekki. Einnig þarf að standa vel að málum gagnvart starfsfólki HAUST. Þá leggur byggðaráð áherslu á að uppgjör vegna niðurlagningar HAUST verði unnið í góðu samráði við sveitarfélögin á Austurlandi.

Samþykkt samhljóða án atkvæðagreiðslu.

Lagt fram til kynningar.

Eftirfarandi tillaga lögð fram:
Byggðaráð Múlaþings gerir ekki athugasemdir við lagafrumvarpið.

Samþykkt samhljóða án atkvæðagreiðslu.

Málinu er frestað til næsta fundar.

Eftirfarandi tillaga lögð fram:
Byggðaráð Múlaþings felur sveitarstjóra að senda inn umsögn um málið í samræmi við umræður á fundinum.

Samþykkt samhljóða án atkvæðagreiðslu.