Heimastjórn Djúpavogs

Fyrir heimastjórn Djúpavogs liggur erindi varðandi öryggi og mönnun í Íþróttamiðstöð Djúpavogs, sem vísað var til fjölskylduráðs þann 26. júní síðastliðinn.
Gunnlaugur Aðalbjarnarson, deildarstjóri íþrótta og tómstunda, kemur inn á fundinn undir þessum lið og gerir grein fyrir stöðu málsins.

Til upplýsinga fyrir íbúa í Múlaþingi, eru lagðar fram til kynningar af vef Fjarskiptastofu eftirfarandi upplýsingar er varðar lokun 3G farsímasambands um allt land.

https://www.fjarskiptastofa.is/fjarskiptastofa/fjarskiptainnvidir/upplysingar-fyrir-neytendur/2g-og-3g-utfosun/

Fyrir liggur erindi frá verkefnastjóra Eyglóar-verkefnisins hjá Austurbrú, þar sem farið er yfir niðurgreiðsluhlutfall raforku fyrir íbúðarhúsnæði í Múlaþingi. Byggðaráð vísaði erindinu til heimastjórnar Djúpavogs með hvatningu um að það verði tekið fyrir á íbúafundi þar sem vakin verði athygli íbúa á þessum möguleika.

Fyrir liggur að ákveða dagsetningu íbúafundar heimastjórnar Djúpavogs að hausti.

Fyrir liggur erindi frá íbúa í gegnum ábendingagátt Múlaþings um hundasvæði á Djúpavogi. Málið var áður á dagskrá 3. september síðastliðinn.

Fyrir liggur fundargerð 2. fundar samráðshóps um Cittaslow á Djúpavogi.

Fyrir liggja ályktanir aðalfundar Náttúruverndarsamtaka Austurlands sem var haldinn 23. ágúst 2025

Framkvæmdir í Markarlandi:
Verkið er á lokametrunum. Gatan var malbikuð í seinni hluta september og hefst gerð gangstétta við götuna nú í haust.
Malbikað var efst í Borgarlandi í sömu mund.

Stofnanir sveitarfélagsins:

Íþróttamiðstöð Djúpavogs
Glænýtt ljósakerfi var sett upp í íþróttasalnum, sem íbúar eru hvattir til að skoða.
Nýtt loftræstikerfi verður sett upp hjá sundlauginni á næstu dögum.

Bókasafn Múlaþings, Djúpavogi
Mikið hefur verið um að vera í bókasafninu. Þar ber fyrst að nefna Sögustund við varðeld, sem bókasafnið hélt í samstarfi við Náttúruskólann 29. september. Bókasafnið stóð fyrir Sögusmiðjunni með Ævari Þór Benediktssyni rithöfundi 22. september. Þar var góð aðsókn.
Auglýst er eftir starfsmanni á bókasafnið. Umsóknarfrestur hefur verið framlengdur til 5. október. Þar til nýr starfsmaður er ráðinn, verður opnunartími skertur. Opið er á mánudögum milli klukkan 15 og 18 í október.

Félagsmiðstöðin Zion
Félagsmiðstöðin vinnur að því að auka þjónustu við börn og unglinga á Djúpavogi. Starfsemi frístundar grunnskólans hefur verið færð úr húsnæði Helgafells yfir í skólann. Þannig gefst félagsmiðstöðinni færi á að hefja opnanir og klúbbastarf að degi til, þrisvar í viku. Það hefur ekki verið mögulegt hingað til. Þar með eykst þjónusta félagsmiðstöðvarinnar um hart nær helming.

Þjónustumiðstöð Djúpavogs
Starfsmenn vinna nú að því að stækka geymslusvæðið í kringum Sambúð. Svæðið verður svo girt af fyrir búnað Þjónustumiðstöðvarinnar.

Leikskólinn Bjarkatún
Framkvæmdir eru í gangi í viðbyggingu leikskólans. Búið er að steypa sökkla og stefnt er því að steypa plötuna í lok október.

Öxi
Vegurinn er með versta móti og íbúar margir orðið þess varir. Vegagerðin staðfestir að heflað verði um leið og veður leyfir, að lágmarki einu sinni í viðbót fyrir veturinn.

Langabúð
Núverandi rekstraraðilar hafa sagt upp samningi frá og með næstu áramótum.
Ákvörðun um framhaldið verður tekin í byggðaráði Múlaþings sem er með málið á dagskrá þann 6. október 2026.

Næsti fundur heimastjórnar Djúpvogs verður fimmtudaginn 5. nóvember kl. 10:00. Erindi fyrir fundinn þurfa að berast starfsmanni heimastjórnar fyrir kl. 16:00 föstudaginn 30. október á netfangið greta.mjoll.samuelsdottir@mulathing.is.